Truh ră anai, Khul đah kơmơi tơring glông Lâm Hà hơmâo gum hrŏm hăng Sang bruă prăk djru mơnuih mơnam, Sang bruă prăk ngă hmua hăng pơđĭ kyar ƀon lan djru brơi đah kơmơi dưi čan prăk hăng yua prăk čan klă hloh. Mơng anun, hơmâo laih rơbêh 5.000 čô ding kơna dưi čan prăk hăng abih tih prăk čan lĕ rơbêh 140 klai prăk; hơmâo 107 grup pơkrem hăng djru čan prăk hăng rơbêh 4.000 čô ding kơna mut hrŏm pơkrem prăk hăng abih tih rơbêh 9 klai prăk.

Hơbô̆ bruă pla lagim amăng sang mơnil ƀơi să Phi Tô, tơring čar Lâm Hà

Hăng bruă mă yua prăk čan klă hloh hơmâo djru brơi 480 boh sang anŏ ƀun rin yua đah kơmơi ngă akŏ sang dưi pơklaih mơng ƀun rin. Yă K’Soang, Khua khul pơlir hơbit đah kơmơi să Phi Tô, tơring glông Lâm Hà brơi thâo:

“Amăng pơđĭ kyar tơlơi bơwih ƀong huă ƀơi ƀon lan ăt hơmâo sa, dua čô mơnuih ba gru, thâo rơgơi bơwih ƀong huă amăng sang anŏ, tơlơi hơdip jai hrơi jơnap pơhmu hăng sang anŏ pơkŏn. Laih dong ƀing ding kơna anai ană tơkeng ană bă djơ̆ tơlơi pơkă, thâo mă yua boh thâo ia rơgơi amăng ngă hmua, anun lĕ hơbô̆ bruă sang păng hăng hơñôl, sang mơnil… ba glăi tŭ yua amăng bơwih ƀong huă”.