VOV4.Jarai - Čơtlăm lơ 20/9, Grŭp hyu mă bruă mơng Grŭp črâo ba pơgang pơgăn hưp ƀong kông ngăn, tơlơi ngă soh mơng dêh čar ta yua kơ Đại tướng Tô Lâm, Ding kơna Ding jum kơđi čar, Kơ-iăng Khua Grŭp Črâo ba bruă pơgang pơgăn hưp ƀong kông ngăn, tơlơi ngă soh ngă Khua Grŭp hmâo mă bruă laih hăng Grŭp apăn bruă Ping gah tơring čar Daknông. Tui tơlơi lăi pơthâo glăi mơng Grŭp apăn bruă Ping gah tơring čar Daknông, bruă pơgang, pơgăn hưp ƀong kông ngăn, tơlơi ngă soh hơdôm hrơi rơgao dưi tơring čar đing nao git gai, črâo ba hăng ngă tui ba glăi bôh tơhnal. Ră anai Grŭp črâo ba pơgang pơgăn hưp ƀong kông ngăn, tơlơi ngă soh tơring čar glăk lăng tui, črâo ba 16 mơta tơlơi, kơđi hmâo gru nam yua bruă pô apăn, rơnoh pô dưi lom pơphun pơsir kơđi tơlơi. Tơring čar hmâo laih 31 mơta kơđi hăng 52 čô mơnuih hmâo arăng ƀom, pel ĕp gah hơdôm tơlơi soh hưp ƀong kông ngăn, bơwih ƀong.

Đơ đam anih mă bruă

Pơhiăp amăng mông mă bruă, Đại tướng Tô Lâm rơkâo pơ̆ anăp anai tơring čar kơtưn git gai, črâo ba hăng pơphun ngă tui, biă ñu sa dua boh yôm phun pơđĭ tui hloh dong tơlơi pơmin, bruă gơgrong mơng hơdôm gưl, kơđi tơlơi hưp ƀong kông ngăn, bơwih ƀong; pơtrut tañ rơnoh bruă pel ĕp, pơsir hơdôm tơlơi ngă soh nao hrom hăng bruă pok pơhai ngă tui ha amăng plĕ hơdôm jơlan pơgang pơgăn hưp ƀong kông ngăn, tơlơi ngă soh.  Đại tướng Tô Lâm lăi lĕ, hrom hăng bruă pơtrut kơtang hơdôm bruă pơgang pơgăn, ngă kơtuă ƀing ngă soh, pơđĭ kyar bơwih ƀong mơnuih mơnam, tơring čar khom đing nao hloh dong bruă hrŏ trun ƀun rin, bơwih brơi tơlơi hơdip kơ mơnuih ƀôn sang./.

Siu H’ Prăk: Pơblang