VOV4.Jarai - Ƀrô hrơi nao mă bruă pơ kual Dap Kơdư, tlam tom brơi lơ 19/9, Đại tướng Tô Lâm, Ding kơna Ding jum kơđi čar, Khua ding jum kông an, Kơ-iăng khua git gai kơ bruă pơgang pơgăn hưp ham kông ngăn dêh čar hơmâo ngă bruă hăng Khul khua apăn bruă git gai Ping gah tơring čar Kon Tum. Ƀơi mông ngă bruă, Khul khua apăn bruă git gai Ping gah tơring čar Kon Tum hơmâo lăi pơthâo hăng Đại tướng Tô Lâm hrŏm hăng ƀing khua tơlơi bơwih ƀong - mơnuih mơnam hăng bruă hơđong plơi pla, pơgang pơgăn hưp ham kông ngăn ƀơi tơring čar. Tơlơi lăi pơthâo brơi ƀuh, mơng akŏ rơwang bruă truh ră anai, Ping gah, Khul khua apăn bruă git gai Ping gah tơring čar Kon Tum hơmâo ngă klă djŏp tơlơi pơtrun mơng Ping gah dêh čar kơ rŭ glăi, pơđĭ kyar bơwih ƀong huă - mơnuih mơnam laih anun ba glăi boh than ƀơi djŏp bruă mă. Amăng 6 blan akŏ thun 2022, prăk pơhrui kơ kơnuk kơna hơmâo năng ai 2.330 klai prăk, dưi ngă rơbêh 58% mrô pơkă hlâo, đĭ 830 klai prăk pơhmu hăng tơđar thun 2021.

Đại tướng Tô Lâm pơhiăp ƀơi mông ngă bruă hăng Khul khua apăn bruă git gai Ping gah tơring čar Kon Tum

Ăt ƀơi mông ngă bruă mơn, Khul khua apăn bruă git gai Ping gah tơring čar Kon Tum lăi pơthâo hăng Đại tướng Tô Lâm hrŏm hăng ƀing khua bruă wai lăng hơđong rơnuk rơnua plơi pla, pơgang pơgăn hưp ham ƀong ngăn kơnuk kơna ƀơi tơring čar. Đại tướng Tô Lâm, Ding kơna Ding jum kơđi čar, Khua ding jum kông an, Kơ-iăng khua git gai bruă pơgang pơgăn hưp ham kông ngăn kơnuk kơna djă pioh kơ hơdôm tơlơi rơkâo đĭ mơng Khul khua apăn bruă git gai Ping gah tơring čar Kon Tum.

Siu H’Mai: Pơblang