Tong ten ñu, amăng 9 blan thun 2023, tơhan kông an wai lăng jơlan Kông an tơring čar Dak Lăk hơmâo ƀuh hăng ngă hră hăng 36.258 čô mơnuih ngă soh tơlơi phiăn nao rai ƀơi jơlan, amăng anun hơmâo 8.650 čô mơnuih mơgăt rơdêh ôtô, rơdêh thut mơñum tơpai ƀier (hăng giăm 23.9% mrô mơnuih ngă soh). Lăp đing nao, hơmâo lu mơnuih “yang riă tơpai” mơgat rơdêh ôtô mơñum tơpai ƀier mơ̆ kông an hơmâo mă hăng đŭ prăk truh kơ 40 klăk prăk. Amăng lu mơnuih ngă soh hơmâo tom ƀing khua, mơnuih ping gah, mơnuih mă bruă kơnuk kơna.

Kiăng pơhlôm rơnuk rơnua jơlan nao rao truh kơ abih thun 2023, tơhan wai lăng jơlan glông Kông an tơring čar Dak Lăk hơmâo prăp lui mơnuih mă bruă, rơdêh, hyu tir na nao ƀơi jơlan anet prong, hơdôm glông jơlan amuñ hơmâo tơlơi truh; akŏ pơdong anih dŏ krăp lăng mơnuih ngă soh mơñum tơpai ƀier hơmâo kôn, hơmâo ma túy amăng drơi...Mơ̆ng anun bơtơhmal khut khăt ƀing mơgăt rơdêh mơ̆ mơñum tơpai ƀier, yua jrao ma túy, đah mơ̆ng plai ƀiă hơmâo tơlơi truh rơbuh rơbeč pơjrom pơtlă ƀơi jơlan.