Tui tơlơi pơtrun, yă Cao Thị Hòa An, Khua jơnum min pơ ala mơnuih ƀôn sang ngă Khua khul git gai. Khul git gai amra ngă bruă jao pơphô bruă brơi Khul apăn bruă Ping gah, Khul djru bruă Ping gah tơring čar git gai pok pơhai tŭ yua hơdră bruă 500 hrơi mlăm tui tơlơi rơkâo mơng Khul git gai dêh čar hăng Khul git gai tơhan kual 5 kơ hyu ĕp, klơi pơƀut hăng ĕp anăn krăn pô tơlang tơleh tơhan djai pơsăn drơi.

Anom bruă git gai ling tơhan tơring čar Dak Lak hơmâo jao anom djru bruă Khul git gai, gum hrŏm hăng gơnong bruă wai lăng bruă mă pơhlôm djop tơlơi gal, pơtum pơƀut glăi djop mơta hăng pơphô bruă ngă tui hơdôm bruă jao. Ơi Lương Nguyễn Minh Triết, Khua git gai Ping gah tơring čar Dak Lak brơi thâo, ngă tui “Hơdră bruă 500 hrơi mlăm pơtrut kơtang bruă hyu ĕp, klơi pơƀut hăng ĕp anăn krăn pô tơlang tơleh tơhan” lĕ bruă jao kiăng ngă ječ, kiăng pok pơhai khut khăt hăng đing nao git gai kiăng ba glăi tŭ yua ƀiă.