Tơlơi pơplông đah kơmơi amăng plơi pơphun bơwih ƀong pơčeh phrâo jing bruă hơmâo amăng Kơčăo bruă “Djru đah kơmơi bơwih ƀong” thun 2025 yua Khul đah kơmơi Dak Lăk pok pơhai mơ̆ng akŏ blan 9 thun anai, pơhưč hơdôm pluh kơčăo bruă mơ̆ng Khul, anom mơdrô prong, anom ngă ƀong hrŏm, ƀut ngă hrŏm hăng hơjăn ƀing đah kơmơi amăng tơring čar gum ngă.

Tui hăng tơlơi pơsit mơ̆ng Grup čŏm puang, hơdôm kơčăo bruă anai kiăo tui akŏ bruă laih, pơdah pran jua pơčeh phrâo hăng kơtưn bơwih ƀong mơ̆ng ƀing adơi amai amăng plơi. Mơ̆ng tal pơplông blung a, Grup pơplông hơmâo ruah mă 18 mơta bruă bơwih ƀong mut pơplông tal rơnuč. Ƀơi anai, ƀing pơplông lăi pơthâo glăi bruă gơñu či bơwih ƀong, ngă rơđah tơlơi pơčeh phrâo, tơlơi dưi sĭ mơdrô, tơlơi đĭ kyar, ăt kah hăng tơlơi bơdjơ̆ nao bruă bơwih ƀong, mơnuih mơnam mơ̆ng kơčăo bruă./.