Tơlơi lăp đing nao hloh lĕ bruă ba sĭ gơnam pơ čar rơngiao hơmâo ngă giong hăng rơgao kơ hơnong pơkă amăng thun, gêh gal biă kơ hơdôm blan rơnuč thun. Prăk ba sĭ gơnam pơ čar rơngiao amăng 9 blan him lăng hơmâo rơbêh 2,3 klai USD, đĭ rơbêh 37% pơhmu hăng tơđar thun 2024 laih anun rơgao hơnong pơkă amăng sa thun. Bruă tuai hyu ngui ăt đĭ mơn, hăng prăk pơhrui hơmâo rơbêh 11.465 klai prăk, đĭ 81%. Bruă sĭ mơdrô, bơwih bơwang ăt đĭ mơn, prăk sĭ gơnam kơ mơnuih blơi yua hăng prăp pơhrui mơ̆ng bruă bơwih brơi mơnuih blơi yua hơmâo giăm 139 rơbâo klai, đĭ 14%.

Kiăng dưi hơmâo rơnoh đĭ kyar amăng sa thun 8%, Jơnum min mơnuih ƀôn sang tơring čar pơsit rơnoh đĭ kyar bơwih ƀong huă hrŏm mơ̆ng tơring čar 3 blan tal 4 khŏm đĭ rơbêh 10%. Ơi Tạ Anh Tuấn, Khua jơnum min mơnuih ƀôn sang tơring čar Dak Lăk kiăng hơdôm anom bruă, să phường khŏm pơƀut ngă bruă, pơtrut brơi prăk tuh pơ alin, biă ñu hơdôm kơčăo bruă yôm phun; pơtrut pơjuă nua blơi lŏn kiăng dưi hơmâo prăp pơhrui djŏp; laih dong pơklaih brơi tơlơi ngă tơnap kơ hơdôm kơčăo bruă gah rơngiao kơnuk kơna djru; pơtrut pơplih klă anom bruă kơnuk kơna hăng pơhlôm rơnuk rơnua hơđong kjăp./.