Mơguah lơ 27/9, Khul khua mua git gai hăng mơnuih ngă bruă sĭ mơdrô hlăk ai rŏng lŏn tơnah (JCI) ƀơi Việt Nam ngă hrŏm Khul đah kơmơi sĭ mơdrô ƀơi plơi prong Ƀuôn Ma Thuôt hăng anom bruă hlăk ai mut phungtơring glông Čư̆ Mgar, pơphun hơdră ƀơk măi komputer hăng hơdrôm hră hrăm kơ čơđai sang hră gưl sa Y Jŭt, să Êa Hđĭng, tơring glông Čư̆ Mgar, tơring čar Dak Lak. Hơdră anai hơmâo ƀơk 30 boh măi komputer hăng 2000 hơdrôm hră hrăm abih tih rơnoh prăk 200 klăk. Tui hăng ơi Nguyễn Xuân Nhạc, khua sang hră gưl sa Y Jŭt, sang hră gơñu hơmâo 670 čô čơđai sang hră, amăng anun čơđai sang hră mơnuih djuai ƀiă truh 70%, hơdôm boh măi komputer hăng hơdrôm hră hrăm, hơdrôm hră hơduah ĕp boh thâo phrâo laih anun hơdrôm hră kač rup anai amra djru kơ čơđai sang hră pơđok, hơduah ĕp tơlơi pơhing boh thâo ia rơgơi arăng pơtô ba amăng hơdrôm hră, đah mơ̆ng pơđĭ tui tơlơi thâo mă yua măi komputer hăng boh thâo ia rơgơi tơlơi pơhing phrâo amăng bruă hrăm hră pơar.

Mơ̆ng anun, pơtrut pơsur pran jua pioh ƀing čơđai hur har hloh hrăm hră. Hrŏm hăng bruă ƀơk măi komputer laih anun ƀơk hơdrôm hră hrăm kơ čơđai sang hră gưl sa Y Jŭt, tlam mơmŏt lơ 27/9, anom bruă dŏ pơphun hơdră anăn “Mơak blan bơrơmi kơ adơi” hăng ƀơk 400 anung gơnam kơ ƀing čơđai Ƀuôn Đrao, să Čư̆ Dliê Mnông, tơring glông Čư̆ Mgar.