Anai lĕ, bruă mă hơdor glăi tal 80 thun hrơi hơkrŭ blan čơpăn lơ 19/8/1945-lơ 19/8/2025 hăng 135 thun Hrơi tơkeng kơ Khua mir sir Hồ Chí Minh, lơ 19/5/1890-lơ 19/5/2025. 33 čô mơnuih ping gah hlăk ai ba gru hlâo mơ̆ng djop tơring glông, plơi prong hăng anom bruă gah khua hlăk ai tơring čar wai lăng hơmâo tŭ mă tơlơi apah bơni tal anai. Ƀing anai lêng kơ ƀing mơnuih ba gru hlâo amăng djop bruă, hrăm hră, mă bruă kơsem min boh thâo ia rơgơi phrâo, pơđĭ kyar bơwih ƀong huă, pơphun bruă mă, ngă bruă gah hlăk ai mut phung, khul grup, ling tơhan pơgang tơlơi rơnuk rơnua, man pơdong plơi pla phrâo hăng pơgang ayuh hyiăng anih dŏ jum dar.

Bruă mă apah bơni mơnuih ping gah hlăk ai ba gru hlâo jing mông gêh găl kơ anom bruă hlăk ai tơdăm dra Dak Lak ăt pơtrut pran jua thâo pơyơr kơ bruă mă, tơlơi pơmin hrưn đĭ amăng ƀing hlăk ai, tơdăm dra mut phung; djru pơgôp hrŏm bruă akŏ pơdong bruă mơnuih tơpuôl, khul hlăk ai kơjăp kơtang, pơtrut tui tơlơi gơgrong mơ̆ng hlăk ai amăng bruă man pơdong hăng pơgang lŏn ia. Man pơdong Dak Lak jai hrơi pơđĭ kyar thâo rơgơi, phrâo hiam hloh.