Lơ 30/12/2023, Khua dêh čar pơsit pơkă kual hrŏm tơring čar Dak Lak rơwang 2021-2030, tơhnal lăng nao truh thun 2050. Tui kual pơkă, thun 2030 tơring čar Dak Lak jing anih yôm phăn, ngă pơhưč tuai čuă ngui amăng lŏn ia hăng dêh čar tač rơngiao; plơi prong Buôn Ma Thuột jing sa anih pơđĭ kyar kual Dap Kơdư, mut hrŏm hăng pơlir hơbit tui jơlan gah pơhư hăng kual laih anun jar kơmar; pơtrut kơtang pơplih hơdră bơwih ƀong tui jơlan pơplih phrâo, đĭ tui tơhnal kơjăp phik amăng pơđĭ kyar. Amăng anun, hrưn đĭ rơnoh đĭ kyar hơnong ñu rim thun rơwang 2021-2030 lĕ 11% sa thun; GRDP hơnong ñu sa akô̆ mơnuih truh thun 2030 hmâo rơbêh kơ 130 klăk prăk. Hơdôm tơhnal pơkă anai dưi pơsit lĕ djơ̆ tui tơlơi lăi pơthâo gum pơhiăp mơ̆ng lu mơnuih juăt bruă, ƀing kơsem min, pô wai lăng ding jum, gơnong bruă, tơring čar, ƀôn prong hăng hơdôm gưl mơnuih ƀôn sang djop djuai ania amăng tơring čar. Ơi Võ Ngọc Tuyên, Khua Gơnong bruă kơčăo bruă - tuh pơplai tơring čar Dak Lak brơi thâo:

 “Kual pơkă tơring čar Dak Lak pơdah bôh tơhnal mơ̆ng bôh thâo khul, pran jua gơgrong mơ̆ng abih glông bruă kơđi čar hăng mơnuih ƀôn sang amăng tơring čar. Dua lĕ dưi lăi kual pơkă tơring čar Dak Lak tal anai dưi pơphun kơđiăng, kơjăp, kiăo tui hơdôm tơlơi pơkă mơ̆ng lŏn ia, kơsem min tŭ mă ruah mă tơlơi găn rơgao jar kơmar hăng lŏn ia, mă yua djơ̆ tui tơlơi ră anai mơ̆ng tơring čar hluai tui anun mă yua klă hơdôm tơhnal gal hăng pơkă lăng hlâo tơlơi tơnap, tơlơi lông pơ̆ anăp anai. Mơ̆ng anun ba tơbiă bruă pơsir pioh hmâo hơdôm jơlan pơsir hơkrŭ đĭ pioh ngă klă bruă pơkă kual”.

Tơhnal lăng truh thun 2050, Dak Lak jing tơring čar hmâo anih anom glai klô, gru grua, tô nao rai pơčeh phrâo, jing anih nao kiăng khăp, lăp dô̆ hơdip. Hrưn đĭ amăng ƀut 25 tơring čar pơđĭ kyar pơdrong asah dŏng akô̆ đơ đam dêh čar. Plơi prong Buôn Ma Thuột jing “Plơi prong kơphê rŏng lŏn tơnah” anih anom phun plơi prong kual, bôh thâo đưm, pơgang lu mơta ra mơnong kual Dap Kơdư hăng kual čơlah tlâo pơđĭ kyar Việt Nam - Lao - Kur, anih anom phun kơsem min mă yua bôh thâo phrâo hăng hơdră phrâo măi mok yua kơ đang hmua jar kơmar. Kiăng dưi ngă tui anai, tui hăng ơi Vũ Văn Hưng, Khua Khul pơ ala mơnuih ƀôn sang plơi prong Buôn Ma Thuột, tơring čar Dak Lak, lĕ:

 “Hluai tui kual pơkă mơ̆ng tơring čar, plơi prong Buôn Ma Thuột amra pơtrut tañ rơnoh pơplih pơkra kual pơkă hrŏm plơi prong Buôn Ma Thuột tui hơdră pơtrun mơ̆ng Khua dêh čar hmâo brơi laih. Hrŏm hăng anun pơphun ngă tui Tơlơi pơtrun pơsit 07 mơ̆ng Khua dêh čar kơ mă yua hơdră pha ra ha jăn pioh kơ plơi prong Buôn Ma Thuột ƀơi sa dua rơwang bruă, ring bruă yôm phăn hmâo lăi pơthâo glăi laih Jơnum min mơnuih ƀôn sang tơring čar pioh lăi pơthâo kơ Ping gah tơring čar pioh mơ̆ng anun amra pok pơhai ngă tui hơdôm yak tô̆ tui. Dua lĕ, hluai tui kual pơkă hrŏm plơi prong amra čih anăn tuh pơplai pioh lăi pơthâo glăi tơring čar ba mut tuh pơplai ƀơi plơi prong amra hmâo kơtưn đĭ wai lăng lŏn drŏn pơdŏng pioh wai lăng klă hơdôm bôh yôm hmâo pơsit amăng kual pơkă. Hluai tui anun ngă gal brơi kơ ƀing tuh pơplai hăng anom pơphun ngă tui kual pơkă tơdơi anai”.

Tui hăng ơi Nguyễn Tuấn Hà, Kơ-iăng Khua Jơnum min mơnuih ƀôn sang tơring čar Dak Lak, hơdôm mơta bruă pơkă hăng tơhnal lăng sui thun amăng kual pơkă mơ̆ng tơring čar lĕ gru than bruă kơđi čar, gru than tơlơi phiăn kơjăp phik pok tơbiă lu tơhnal gal phrâo, čang rơmang kơ tơlơi pơđĭ kyar pơplih phrâo, tañ hăng kơjăp phik. Kiăng prăp lui čơkă phun hơdôm anô̆ gal, tơring čar hmâo ba tơbiă laih 4 bruă mă phun anun lĕ: dăp glăi hơdôm bruă ngă đang hmua, măi mok; pơđĭ kyar plơi prong; mă yua lăp djơ̆ kông ngăn glai klô; kơtưn tô nao rai pơlir kual, pơlir tơring čar; hăng 5 mơta pơplih phrâo lĕ: pơplih hơdră bruă čar, anih anom tuh pơplai bơwih ƀong sĭ mơdrô; tô nao rai jơlan glông; pơđĭ kyar, mă yua bôh thâo phrâo măi mok hăng pơplih phrâo pơčeh phrâo; pơjing jơlan phrâo phun, abih bang gah pơđĭ kyar pơtô pơhrăm pơtô juăt hăng bruă ia jrao; pơdŏng anom mă yua ha amăng plĕ, phrâo rơnuk anai. Ơi Nguyễn Tuấn Hà brơi thâo:

 “Khua dêh čar pơsit kual pơkă tơring čar Dak Lak hmâo pok tơbiă hơdôm tơhnal gal pơđĭ kyar phrâo hăng pơjing gru than phrâo yôm kơ tơring čar. Hluai tui wai lăng lăp djơ̆ ba glăi bôh tơhnal hơdôm ngăn rơnoh lŏn drŏn kông ngăn lŏn čuah, glai klô, ia yua kơ hơdôm bruă pơđĭ kyar kơjăp sui thun, đĭ kyar mơtah djơ̆ tui pơplih ayuh hyiăng, hmao thâo hơdôm tơhnal gal amăng lŏn ia hăng jar kơmar biă ñu bruă hơkrŭ măi mok tal 4 pioh hmao tui jơlan gah pơplih mrô ngă brơi Dak Lak pơđĭ kyar tañ kơjăp phik mut hrŏm hăng hrưn đĭ ƀơi gru than phrâo”.

Dap Kơdư hmâo anih anom yôm phăn gah kơđi čar, bơwih ƀong, bôh thâo, pơgang lŏn ia – rơnuk rơnua pơtom hiăp hăng đơ đam dêh čar. Amăng anun, Dak Lak dưi lăng lĕ anih anom phun mơ̆ng kual Dap Kơdư. Amăng mông jơnum lăi pơthâo tơlơi pơsit pơkă kual tơring čar Dak Lak phrâo anai, sa wot dong Kơ-iăng Khua dêh čar Trần Hồng Hà pơtŏng sit, Dak Lak hmâo anih anom yôm phăn, hmâo anô̆ gal lu, hmâo gru grua bôh thâo lu mơta. Pơkă kual tơring čar Dak Lak lĕ sa yak pơplih phrâo hơdră pơtrun prong mơ̆ng Ding jum kơđi čar ƀơi Tơlơi pơtrun pơsit mrô 23 kơ jơlan gah pơđĭ kyar bơwih ƀong – mơnuih mơnam hăng pơhlôm pơgang lŏn ia, rơnuk rơnua plơi pla Dap Kơdư truh thun 2030, tơhnal lăng nao truh thun 2050. Yua anun, Kơ-iăng Khua dêh čar ta Trần Hồng Hà rơkâo:

 “Bruă blung a mơ̆ng kơčăo bruă anun lĕ bruă amra gum hrŏm hăng hơdôm bôh  tơring čar pơkon ƀơi Dap Kơdư pel ĕp glăi kual pơkă kual Dap Kơdư tơlơi anai yôm phăn biă. Yua kơ amra ƀuh ƀô̆ mơta Dak Lak amăng pơlir nao rai hăng hơdôm kual. Ƀuh anih anom phun mơ̆ng Dak Lak ƀơi bruă pơlir hơbit hăng kual anet ƀơi Dap Kơdư, hăng hơdôm kual prong pơkon kah hăng kual kơtuai hang ia rơsĭ, ngŏ dơnung ƀudah jar kơmar kah hăng Kur hăng hơdôm bôh dêh čar kual Đông Nam Á pơkon. Hrŏm hăng tơlơi pơđĭ kyar mơ̆ng kual hăng kual anet kâo pơmin amra pơjing rai sa Dap Kơdư hmâo tơhnal ƀuh rơđah tañ biă”.

Amra lăi djơ̆ mơn, bruă pơsit, thâo hăng mă yua klă tơhnal gal, tŭ yua hrŏm hăng kual pơkă abih bang mơ̆ng tơring čar, Ping gah, gong gai, mơnuih ƀôn sang djop djuai ania tơring čar Dak Lak amra ngă tui pran pô, hơneč mă gah rơngiao pơjing pran pơplih mơ̆ng “thun Ania jơgrai 2024” ngă brơi bruă bơwih ƀong mơnuih mơnam mơ̆ng tơring čar đĭ kyar kơtang, pơđĭ kyar tañ hăng kơjăp phik ƀơi črăn jơlan phrâo./.