Dak Lak glăk đing nao rŭ pơdong glăi anŏ răm rai yua hơjan ia ling dăo, ngă tui pran gum pơgôp, gir run pơgiong hơdôm hơnong pơkă pơđĭ kyar bơwih ƀong huă-mơnuih mơnam, bruă phun lĕ tơlơi rơkâo pơđĭ kyar dua mrô amăng thun 2026. Anai lĕ jơlan gah hơmâo ba tơbiă amăng jơnum lok 2, Jơnum min pơ ala mơnuih ƀôn sang tơring čar tal X, phrâo pơđut hĭ tlam (24/12). Amăng mông jơnum ƀing khua mua hơmâo bơtŭ ư tŭ yap mă yua 24 tơlơi pơtrun akŏ phun, ngă atur brơi pơđĭ kyar bơwih ƀong huă-mơnuih mơnam amăng thun 2026 hăng rơwang thun 2026-2031 anun lĕ pơhrơ̆i hrơi blan kah pơpha prăk tuh pơ alin brơi hơdôm akŏ bruă yua ngăn drăp ƀon lan; kah pơpha ngăn drăp kơnuk kơna pơhrua tui hơnong pơkă thun 2025; tơlơi pơkă kơ nua lŏn mơnai amăng tơring čar Dak Lak…

Khua mua tơring čar Dak Lak rơkâo mơng anai truh Tết tui phiăn juăt Bính Ngọ 2026, djop gơnong bruă đing nao ngă klă hơdră djru mơnuih mơnam, bơwih brơi tơlơi hơdip mơnuih ƀôn sang; pok pơhai klă hơdôm jơlan hơdră tui hơnong pơkă dêh čar kơ pơhrŏ trun ƀun rin hơđong kjăp hăng pơđĭ kyar bơwih ƀong huă-mơnuih mơnam kual mơnuih djuai ania ƀiă. Blung hlâo, kiăng đing nao djru mơnuih ƀôn sang rŭ glăi bơwih ƀong huă, hơđong tơlơi hơdip mơda, hơđong pran jua čơkă thun phrâo.