Tui hăng ƀing kơhnâo, mơnuih wai lăng, mah hơmâo tơlơi gêh găl prong biă, Dak Lăk ăt glăk bưp lu tơlơi lông prong kah hăng hrŏ trun kông ngăn glai rưng, ngă hmua ƀu hơđong, tơnap yua adai pơplih sat laih anun tơlơi pơkă jai hrơi tơnap mơ̆ng anih mơdrô kơ hơnong pơkă mơtah hơdjă, aset đôč hyuh hơƀak.

Kiăng đĭ kyar bơwih ƀong mơtah tŭ yua, Dak Lăk hơmâo pơsur kiăng pơplih tơlơi pơmin mă yua kông ngăn jing đĭ kyar bơkơnar plah wah bơwih ƀong huă hăng pơgang ba djŏp mơta ra mơnŏng ayuh hyiăng glai klô; pơƀut đĭ kyar ngă hmua dưi mă yua glăi djah djâo, bơwih ƀong pơdar nao rai, hơmâo rơnoh pơkă carbon, pơtruh hrŏm đĭ kyar anih čuă ngui amăng plơi pla nao hrŏm hăng djă pioh răk lui gru grua laih anun kông ngăn hơmâo mơ̆ng ia rơsĭ, glai rưng. Yă Đặng Thị Thủy, Kơ-iăng khua gơnong bruă hmua hăng ayuh hyiăng tơring čar Dak Lăk brơi thâo, đĭ kyar bơwih ƀong mơtah ƀu kơnong jing jơlan bơwih ƀong khŏm ngă đôč ôh, ăt jing tơlơi kiăng ngă ječ ameč kiăng Dak Lăk dưi anăp nao đĭ kyar hơđong kjăp pơ anăp anai./.