Amăng 9 blan thun 2026, bruă bơwih ƀong huă ƀơi hơdôm boh să, phương ter hang ia rơsĭ ƀơi tơring čar Dak Lak tŏ tui hơđong; bruă sĭ mơdrô, bơwih bơwang, tuai čuă ngui hăng hyu mă, rông akan hơdang hơmâo lu tơlơi pơplih. Hơmâo 09/15 boh ƀon lan pơgiong, ngă tañ ƀiă bruă pơhrui ngăn drăp thun 2026. Hơmâo 06 boh ƀon lan dŏ kaih jao prăk tuh pơ alin man pơdong. Amăng anun, să Tuy An Đông jao 0%, să Xuân Cảnh giăm 30%, Xuân Lộc rơbêh 56,5% hăng phương Sông Cầu giăm 57%.

Samơ̆, bruă ngă hmua, tuh tia pơkra ming, man pơdong sang dŏ, wai lăng lŏn mơnai, bruă man pơdong, tuh pơ alin ăt dŏ lu tơnap tap. Bruă dưm dăp, pơsir hĭ bruă kông ngăn kơnuk kơna ƀơi sa, dua boh ƀon lan ăt dŏ bưp lu tơnap tap. Bruă kơƀah mơnuih apăn bruă ngă djơ̆ bruă, gơnam măi mok mă yua aka ƀu mut hrŏm ha amăng plĕ, glăk bơdjơ̆ nao bruă ngă, kaih lơm pơsir hĭ bruă mă, sit biă ñu lĕ hơdôm bruă lŏn mơnai, dưm dăp man pơdong, prăk kak, tuh pơ alin hăng boh thâo măi mok.

Amăng 03 blan rơnuč thun 2026, bruă jao dŏ glăi ăt lu biă, sit biă ñu lĕ jao prăk mă yua, pơgiong hơdôm ring bruă, akŏ bruă. Lơm anun rơwang tal IV ăt lĕ hrơi blan hơjan kơthel, amra bơdjơ̆ nao bruă mă, yua anun tơdah ƀu hơmâo hơdră krăo lăng amra tơnap tap kiăng ngă tui hơdôm hơnong pơkă pơđĭ kyar.

Amăng mông jơnum, hơdôm boh ƀon lan brơi thâo, hơmâo pơsit tong bruă jao, hơdră ngă tui amăng rĭm blan amăng rơwang tal IV hăng glăk tŏ tui pel ĕp, pơgiong jơlan gah pơđĭ kyar. Khua Jơnum min mơnuih ƀon sang tơring čar Dak Lak ơi Đỗ Hữu Huy, ăt đing nao hơdôm boh ƀon lan ăt hơmâo rơnoh bơwih ƀong pơhrui glăi lu kiăng hơmâo hơdră ngă bruă tong ten kiăng dưi ngă tui hơdôm hơnong pơkă pơđĭ kyar. Ñu brơi thâo amra mă yua KPI hăng ƀing apăn akŏ, sit biă ñu lĕ Khua git gai Ping gah hăng Khua Jơnum min mơnuih ƀon sang gưl să. “Kiăng pơhlôm ngă pơgiong 10 hơnong pơkă pơđĭ kyar amăng rơwang tal 4, rĭm boh ƀon lan kiăng pel ĕp glăi rĭm hơnong pơkă hăng jao bruă brơi rĭm čô mơnuih apăn bruă, čih tong ten hrơi mông kiăng ngă pơgiong. Gơnong bruă wai lăng bruă mă lăng tui 10 hơnong pơkă anai hăng sa, dua hơnong pơkă pơkŏn kiăng pơtum pơƀut, mơ-it nao Khua Jơnum min mơnuih ƀon sang tơring čar kĭ ba tơbiă tơlơi črâo ba ngă tui KPI rơwang tal 4 mơng ƀing khua Jơnum min mơnuih ƀon sang hơdôm boh să, phương.”

Ƀơi anăp kơ bruă amăng hơdôm blan rơnuč thun 2026 amra ƀuh hơjan kơthel, hơdôm boh ƀon lan ter hang ia rơsĭ tơring čar Dak Lak hơmâo pơpha bruă ƀơi rĭm bit anih hăng pel ĕp glăi hŭi ƀuh tơlơi truh sat kiăng tañ ba đuăi mơnuih ƀôn sang. Hơdôm boh să, phương ăt hơmâo hơdră pơhlôm hlâo brơi kual rông akan hơdang ter hang ia rơsĭ; pơhlôm rơnuk rơnua brơi ƀattô hyu mă akan hơdang.

Khua mua Jơnum min mơnuih ƀon sang tơring čar Dak Lak rơkâo hơdôm boh ƀon lan kiăng hơmâo hơdră bruă tong ten, lăi pơthâo brơi rĭm boh sang anŏ amra ba đuăi tơdah hơmâo hơjan kơthel, rơdêh djru ba đuăi hăng anih nao kơđăp, anăm brơi sư̆ rơbư̆ ƀu hmao thâo./.