Thun 2026, bruă ngă hmua amăng kual Dap Kơdư hăng kual ter hang ia rơsĭ Dơnung tong krah ăt hơđong hăng đĭ kyar. Đơ đam hmua pơdai hơmâo năng ai 782.000 ha, hnơ̆ng pơdai pơhrui glăi sa hektar truh 65 tă, jing 6 tơn mơkrah lơm sa hektar, pơdai hơmâo pơhrui abih bang truh 5 klăk tơn. Boh troh lĕ pĕ pơhrui hơmâo 3 klăk tơn. Hăng phun boh troh, kyâo pơtâo sui thun, kơphê ăt phun pla gơgrong yom amăng kual hơmâo 57.000 ha hăng rơbêh 600 boh sang bruă anung gơnam tơpung kơphê pioh sĭ mơdrô, prăk pơhrui glăi mơ̆ng bruă sĭ mơdrô hơmâo 6,5 klai USD.

Khă hnun, bruă ngă hmua amăng kual ter hang ia rơsĭ Tong krah hăng kual Dap Kơdư ăt bưp lu tơlơi tơnap tap yua kơ bruă ba yua rơdêh, măi mok dŏ ƀiă đơi, bruă ruah pơjeh pla aka djơ̆ anŏ kiăng, kman, arong aruač hlăt pơčrăm jai hrơi arăng pơkă tong ten hơdră pruih ia jrao, tui anŏ kiăng mơ̆ng anih blơi pơ tač rơngiao. Ƀơi anăp tơlơi či hơmâo kah hăng adai không phang kơsing pah prong yua El Nino, ayuh hyiăng pơblih sat, djop tơring čar rơkâo lăi nao kơ bruă bư̆ pơkong hnoh ia pling nao pơ hmua, wai lăng gơnam yua pioh ngă hmua hăng pơphun bruă ngă hmua tŭ yua hloh, ngă tui tơlơi pơtô, akŏ klôn, djơ̆ găl. Ƀơi mông jơnum, Ding jum Ngă hmua hăng pơgang ayuh hyiăng lăi pơtong, kiăng pơđĭ tui anŏ ngă hmua pla pơjing djơ̆ hơdră, lir hơbit bruă ngă hrŏm sang bruă mơdrô hăng mơnuih ngă hmua. Ƀơi anăp kơ tơlơi či hơmâo El Nino ngă rai adai không, kơƀah ia, djop plơi pla, tơring čar prăp lui hơdră či bong glăi, sem lăng abih bang hnoh ia, ia dơnao, ring bruă dơnao pơkong ia, pơblih pơjeh phun pla brơi djơ̆ găl, kiăng pơhlom phun pla sit hơmâo adai không phang kơsing pah prong ngă huăi rơngiă hĭ soh sel.