Tal hrăm anai pơphun prong hăng lu mơnuih, ling tơhan laih anun gơnam yua mă bruă, hơmâo rơbêh 2.600 čô mơnuih hăng hơdôm rơtuh boh rơdêh, măi mok, gơnam yua amăng bruă mă gah ling tơhan, hơmâo wơ̆t rơdêh por bĕk, asâo tơhan. Boh yom phun hrăm hrŏm tal anai, hơmâo 2 črăn phun: Akŏ pơdong anih khua git gai mă bruă hăng jao bruă mă, pơphun brơi črăn hơdră bruă či ngă hrŏm hơbit.

Črăn 2 lĕ ngă tui sit nik bruă bong glăi hăng tơlơi truh bơhmutu hơmâo kơthel kơtang hloh, kah hăng bruă anăp nao: Djru pơklaih brơi mơnuih amăng mông ječ ameč, djru mơnuih ƀôn sang amăng kual ia ling dăo hăng pok pơhai brơi pơdong sang ia jrao tơhan jăng jai; djru tŭ jum, pơjrao brơi mơnuih ruă nuă ječ ameč truh, ming pơkra glăi ring bruă răm ƀăm dlưh rai; bong glăi anŏ ngă ƀruač, bơtơbiă ia jrao sat hŭi rơhyưt kơ ană mơnuih…..Tal pơtop hrăm anai, kiăng pơđĭ tui tơlơi thâo git gai bruă mă, hăng tơlơi thâo hơdai gum hrŏm, abih bang ling tơhan klâo boh dêh čar Việt Nam-Lao-Kur amăng bruă pơdjru nao rai amăng mông ječ ameč truh lơ̆n adai ngă; kiăng dưi ngă djơ̆ bruă jao, tơlơi hơmâo djru mơnuih ƀôn sang pơhlom mă pô amăng tơlơi pơhing phrâo rung răng truh.