Amăng đang hmua prong 7 ar ƀơi plơi Đồng Giai, să Ea M’Đroh (Dak Lak), dua rơkơi bơnai ayong Lý Thanh Tiền (djuai ania Dao) glăk dŏ jik rơk, pơluk kam brơi rơmô ƀong hăng giăm hơdôm hơpluh drơi. Ñu brơi thâo, rơmô anai hơmâo pơdjuai mơng dua drơi rơmô kơnô ania tuh hrôh yua tơring čar djru brơi thun 2021. Yua rông hlô pơlir hăng pla pơjing, sang anŏ ñu hơmâo hrưn đĭ pơklaih mơng ƀun rin, man pơdong sang prong rơhaih, čem rông ană bă hrăm hră:

“Hlâo anun sang anŏ gơmơi dong amăng mrô sang anŏ ƀun rin, hơmâo kơnuk kơna djru brơi 2 drơi rơmô kơnô ania hăng 2 drơi bê rông tuh hrôh, laih dong djru brơi boh thâo rông hlô, pla pơjing kiăng sang anŏ pơđĭ kyar bơwih ƀong huă. Ră anai sang anŏ dưi pơklaih mơng ƀun rin. Ƀing gơmơi čang rơmang Ping gah tơring čar Dak Lak rơwang mă bruă phrâo tŏ tui djru brơi hơdôm jơlan hơdră pơhrŏ trun ƀun rin kiăng neh met wa amăng plơi pla gêh gal hrưn đĭ tơbiă mơng ƀun rin, hơđong tơlơi hơdip mơda.”

Ƀơi ƀuôn Cuôr, să Ea M’Đroh, anih abih bang mơnuih lĕ djuai ania Êđê, ơi Y Sắc Kbuôr, Khua plơi brơi thâo, yua hơmâo tơlơi đing nao mơng Ping gah hăng kơnuk kơna, hrĕ apui lơtrik dăng hyu djop, hơmâo ia hơdjă, jơlan glông, sang hră hăng sang ia jrao hơmâo tuh pơ alin man pơdong ha amăng plĕ. Mơng jơlan hơdră pơhrŏ trun ƀun rin, rơbêh 120 boh sang anŏ arăng djru brơi sang dŏ, pơjeh phun pla, hlô rông pơđĭ kyar bơwih ƀong huă hơđong tơlơi hơdip. Ră anai plơi pla dŏ 40 boh sang anŏ ƀun rin, giăm 12%. Ơi Y Sắc brơi thâo:

“Ƀing gơmơi ăt čang rơmang tơring čar tŏ tui đing nao tuh pơ alin djru brơi hơdôm boh sang anŏ dŏ glăi kơ pơjeh phun pla, hlô rông kiăng neh met wa gêh gal pơklaih mơng ƀun rin.”

Tơdơi kơ pơmut hrŏm hăng Phú Yên, tơring čar Dak Lak ră anai hơmâo 3,34 klăk čô mơnuih, amăng anun ¼ mrô mơnuih lĕ djuai ania ƀiă. Tha plơi Y Jiê Niê, dŏ amăng să Ea M’Đroh brơi thâo, hơdră djru djuai ania ƀiă amăng rơwang ngă bruă rơgao hơmâo tơring čar Dak Lak ngă ba glăi tŭ yua. Plơi pla jai brơi pơplih phrâo. Kiăo tui lăng Jơnum khua mua Ping gah tơring čar, tha plơi Y Jiê čang rơmang:

“Neh met wa čang rơmang Ping gah tơring čar dưi ruah ƀing mơnuih thâo rơgơi kiăng git gai mơnuih ƀôn sang tơring čar ba tơlơi bơwih ƀong huă pơđĭ kyar kơtang ƀiă dong, tơlơi hơdip mơng neh met wa trơi pơđao, yâo mơ-ak ƀiă. Neh met wa amăng tơring čar amra djru brơ bruă man pơkra dong hơdôm ară jơlan, dơnao pơkŏng ia, sang hră kiăng ƀing čơđai dưi hrăm hră djop hăng hơmâo bruă mă.”

Rơwang thun 2020-2025, tơring čar Dak Lak hơmâo pok pơhai ha amăng plĕ lu jơlan hơdră, akŏ bruă pơhrŏ trun ƀun rin kual mơnuih djuai ania ƀiă hăng abih tih rơbêh 4.220 klai prăk. 1.866 boh sang hơmâo man pơdong, 5.228 boh sang anŏ djru brơi tơlơi bơwih ƀong huă, mrô sang anŏ ƀun rin pơhrŏ trun amăng rĭm thun hăng truh rơnuč thun 2025 dŏ kơnong rơbêh 10%.

Ơi Võ Trần Quang, kơ-iăng khua anom pơtô bruă Ping gah hăng pơtô ba mơnuih ƀôn sang tơring čar Dak Lak brơi thâo, tơlơi pơtrun Jơnum rơwang thun 2025-2030 ba tơbiă lu hơnong pơkă pơtrut kơtang pơđĭ kyar bơwih ƀong huă-mơnuih mơnam, laih dong tŏ tui hơdôm jơlan hơdră pơhrŏ trun ƀun rin, sit biă ñu kual mơnuih djuai ania ƀiă.

“Ping gah tơring čar ăt hơmâo pơsit bruă jao akŏ phun kơ bruă đing nao tuh pơ alin hăng ngă tui boh tŭ yua amăng hơdôm hơdră djru djuai ania amăng rơwang anai ƀơi tơring čar. Amăng anun, gir run pơhrŏ 2% mrô sang anŏ ƀun rin đơ đam tơring čar hăng hrŏ 3% amăng kual mơnuih djuai ania ƀiă pơ glông.”

Neh met wa djop djuai ania ƀơi tơring čar Dak Lak đăo gơnang, čang rơmang Jơnum Ping gah tơring čar tal I rơwang thun 2025-2030, tơring čar amra hơmâo hơdôm tơlơi yak nao pơđĭ kyar kơtang, tơlơi hơdip mơnuih ƀôn sang tŏ tui pơplih kơtang./.