Thun hrăm phrâo 2026-2027, Sang hră kơnuk kơna čem rông ba gưl I hăng gưl II Ia R’vê hơmâo 34 anih hrăm hăng 880 čô čơđai, amăng anun 216 čô čơđai dŏ đăm glăi. Ơi Hồ Sĩ Cát, Khua sang hră brơi thâo, hrŏm hăng prap lui djop tơlơi gal djru brơi bruă pơtô hrăm, sang hră đing nao biă mă kơ bruă pơgang kman brơi ƀing čơđai sang hră. “Ƀing gơmơi gum hrŏm hăng Sang ia jrao să Ia R’vê, Sang ia jrao Khul bơwih ƀong-Ling tơhan mrô 737 pơphun hyu pruih ia jrao pơdjai keč, arŏng aroač jum dar sang hră, anih dŏ, anih ƀong huă. Pơtă pơtăn ƀing čơđai kiăng rơmet pơagaih amăng anih dŏ. Laih dong, rơkâo anom bruă ia jrao sang hră prap lui djop ia jrao kiăng kơ tlâ̆o pơjrao brơi ƀing čơđai duam ruă”.

Amon Đậu Anh Thư, 10 thun, dŏ amăng să Ia R’vê tal blung a ataih mơng sang anŏ nao hrăm hăng dŏ đăm glăk pơ sang hră. Tơdơi kơ ha wŏt hrơi tơjuh juăt hăng anih hrăm phrâo, Anh Thư hơmâo ƀơƀrư̆ thâo hơdip mă hơjan pô: “Hlâo kơ huă asơi kâo juăt rao tơngan, ngă tui bruă huă gơnam tơsă, mơñam ia pơ-iă. Lơm tơbiă hyu ngui, anăm ngui ƀơi hơdôm anih djrưh pơsah, anih lu keč čeh čar, kiăng pơgang hŭi ƀă kman. Ƀing gơmơi ăt pơpha hrơi kih rơmet. Lơm pit đih kiăng akă mông sơker hŭi kơ keč akĕ”.

Đơ đam tơring čar Dak lak ră anai hơmâo 650.000 čô čơđai kiăo tui hrăm ƀơi 625  boh sang hră. Ơi Lưu Tiến Quang, kơ-iăng Khua gơnong bruă pơtô pơjuăt tơring čar Dak Lak brơi thâo, bruă pơgang kman mơng sang hră hơmâo gơnong bruă pơsit lĕ bruă jao akŏ phun. “Gơnong bruă pơtô pơjuăt hơmâo git gai hơdôm anih pơtô hrăm, hơdôm boh sang hră, sit biă ñu kual ataih, kual asuek, gơgrong amăng bruă rơmet pơagaih jum dar anih dŏ, anih hrăm kiăng pơgang kman duam đung drah. Laih dong, hăng hơdôm tơlơi ruă juăt ƀă hyu ƀuh tui bơyan phara, rơkâo anom bruă ia jrao sang hră kiăo tui lăng kiăng pơgang hyu kman lar hyu amăng sang hră”.

Ơi ia jrao Hoàng Hải Phúc, Khua anom bruă pơgang tơlơi duam ruă tơring čar Dak Lak brơi thâo, thun hrăm phrâo ăt lĕ hrơi mông yak nao bơyan hơjan hlim, ngă kơ lu kman lar hyu lu kman duam ruă anun lĕ duam đung drah, ƀam ƀong tơkai, tơngan hăng mơbah, ruă djơ̆ drăng…ƀuh lu tui. Gơnong bruă ia jrao gum hrŏm hăng gơnong bruă pơtô pơjuăt glăk pok pơhai hơdôm hơdră gơgrong pơgang kman: “Hơdôm boh ƀon lan pok pơhai hơdôm bruă rơmet pơagaih jum dar, pơagaih amăng sang kiăng pơgang hơdôm kman ruă anun lĕ duam đung drah, ƀam ƀong tơkai, tơngan hăng mơbah, ruă djơ̆ drăng; laih dong kơtưn bruă tlâ̆o pơhrua, tlâ̆o brơi abih bang ƀing čơđai aka ƀu tlâ̆o pơgang djop. Ƀơi hơdôm boh sang hră hăng hơdôm boh ƀon lan amuñ ƀuh kman lar hyu, ƀing gơmơi pơkiăo ƀing apăn bruă nao ĕp lăng kơ mrô pơkă véc-tơr, mrô pơkă keč moaih čeh čar hăng tơdơi ƀuh glăk lu tui, amra pơgiăng nao măi pruih ia jrao pơdjai keč, arŏng aroač ƀơi djop anih”./.