Mông jơnum hơmâo lu khul khua mua, ƀing khua apăn akŏ dêh čar, khua mua mơ̆ng hơdôm anom bruă kơsem min hăng rơngit adai, khul grup jar kmar, hơdôm sang bruă mơdrô, ƀing kơhnâo kơsem min boh thâo hăng rơngit adai rai mơ̆ng 130 boh dêh čar; laih anun pơtruh hăng Anih kơsem min Rơngit adai jar kmar ISS. Mông jơnum hơmâo lu bruă pơčrông sai hơdră ngă bruă, ba pơƀuh tơlơi ngă hrŏm jar kmar kơ boh thâo ia rơgơi, bơwih bơwang, kơsem min pơtô pơjuăt gah bruă rơngit adai, kiăo tui hơdôm jơlan gah ngă hrŏm jar kmar pơtrut bơwih ƀong gah bruă rơngit adai, pơhlom rơnuk rơnua hăng adai kiăo tui bruă pơtom hiăp hăng ngă hrŏm, pơtrut boh thâo ia rơgơi hyu ĕp, sem lăng hăng rơngit adai yua kơ tơlơi hơdip klă hiam kơ ană mơnuih ta kơñ pơgi.

Pơhiăp ƀơi mông pơčrông sai, Khua ping gah, Khua mir sir ơi Tô Lâm lăi nao 5 mơta tơlơi pơkă wai lăng lu bơnah hăng rơngit adai, iâu pơthưr ƀu dưi pơhŭi ƀudah mă yua phao kơtuang kơtư̆ juă, lăng ană mơnuih hăng boh lŏn yơh phun ñu. Ñu rơkâo Việt Nam hăng Prang, Sang gum hơbit djŏp dêh čar, ASEAN hăng hơdôm sang bruă gum kơsem min akŏ pơjing “Anih anom yua kơ tơlơi đĭ kyar hăng tơlơi dưi pơgăn glăi anŏ sat răm”, pơƀut kah pơpha, lăi pơthâo, mă yua tơlơi pơhing mơ̆ng rơngit adai laih anun pơtruh hrŏm kơsem min - pơtô pơjuăt - sang bruă mơdrô - tuh pơ alin kiăng đĭ kyar bơwih ƀong huă gah rơngit adai. Anih anom anai dưi mơn ngă hlâo ƀơi kual Ngŏ ASIA, amăng anun Việt Nam amra ngă anih pơtruh brơi./.