Dua čô khua pơdah pran jua hơ̆k mơak lơ̆m ƀuh tơlơi pơđĭ kyar hlom bom hăng tŭ yua sit nik tơlơi ngă giăng mah rô nao rai plah wah Việt Nam-Mông Cổ, biă mă ñu dơ̆ng mơ̆ng hrơi dua bơnah dêh čar akŏ pơjing bruă pơtom hiăp tong ten hloh, amăng tal nao čuă jơmư gưl kơnuk kơna truh pơ Mông Cổ, mơ̆ng Khua ping gah, khua mir sir ơi Tô Lâm blan 9/2024.

Dua bơnah tŭ ư ăt ngă kơjăp hloh tơlơi đăo kơnang bruă kơđi čar, djă pioh bruă bưp nao rai khua mua pơprong hăng lu hơdră ngắ hmar ƀiă; pok pơhư bruă pơtom hiăp, pơgang rơnuk rơnua dêh čar, kiăng bruă ngă giăng mah ba glăi boh tŭ yua kơ dua bơnah, pơjing rai anŏ pơblih kơtang ngă hrŏm bơwih ƀong huă, sĭ mơdrô hăng tuh pơ alin, amăng anun pơtrut hmar pơphun jơnum lok 20 mơ̆ng Jơnum min lir hơbit kơnuk kơna Việt Nam-Mông Cổ; kơtưn ngă djơ̆ tơhnal pơkă pơhrui glăi prăk sĭ mơdrô đĭ truh 200 klăk USD; pơtrut ngă hrŏm gah bruă kơsem min boh thâo ia rơgơi, tuai čuă ngui, ba yua mrô, pơkra apui yua hơdjă, ia jâo rơgoh huăi tơbiă asăp. Khua dêh čar Mông Cổ rơkâo bruă kơsem min, pơtrut ngă hrŏm klâo bơnah Việt Nam-Mông Cổ-Khač kiăng ba glăi boh tŭ yua lu hloh, pơtrut ngă hrŏm gah bruă čuk pơkra jơlan nao rai pơdŭ pơgiăng hăng logistics.