Hơnong pơkă amăng mông jơnum ba tơbiă amăng 5 thun pơ anăp hrưn đĭ thâo rơgơi tơlơi Angle hăng boh thâo mut hrŏm jar kmar brơi ƀing čơđai sang hră gưl prong; gum hrŏm, djru brơi hăng pơđĭ kyar čơđai sang hră gưl prong djuai ania ƀiă amăng tơring čar. Dak Lak ră anai hơmâo rơbêh 14.400 čô čơđai sang hră, kiăo tui hrăm 12 boh sang hră gưl prong, Cao đẳng. Amăng anun hơmâo giăm 3.000 čô čơđai mơnuih djuai ania ƀiă.

Amăng 5 thun laih rơgao, tơlơi pơhun amăng khul čơđai sang hră hăng bruă mă mơng khul čơđai sang hră gưl prong Việt Nam tơring čar Dak Lak hơmâo tơlơi pơđĭ kyar hăng lu bruă mă, pơphun dik dak, pơhưč lu hlăk ai čơđai mut hrŏm. Lu jơlan hơdră bruă mă sit nik yua mơnuih mơnam anun lĕ: Djru bơyan pơdơi prong, djru bơyan pơplông, hơdôm tal pơphun “Pơjing hlăk ai ba gru tơring čar Dak Lak rơwang phrâo”, “Rĭm hrơi sa tơlơi klă, rĭm rơwang hrơi tơjuh sa bruă hiam” hơmâo ƀing čơđai mut hrŏm. Rơbêh 3.000 čô čơđai tơnap tap hơmâo djru brơi prăk hrăm hră hăng abih tih nua ñu rơbêh 3 klai prăk.