Ơi Nguyễn Tài, dô̆ ƀơi thôn 15, să Ea Yông, tơring glông Krông Pač, tơring čar Dak Lak lơm nao ngă hră pơ-ar ƀơi anih “Sa bah amăng” pơ̆ Jơnum min mơnuih ƀôn sang să Ea Yông. Ơi Nguyễn Tài lăi lĕ, bruă hơdôm gưl gong gai pơtrut kơtang pơplih ngă hră pơ-ar hơdôm hrơi rơgao hmâo ba glăi laih bôh tŭ yua sit nik kơ mơnuih ƀôn sang, khul grŭp, anom bơwih ƀong. Amăng anun, yak lăp djă pioh hloh lĕ hơdră “Plăng Zalo tô nao rai abih bang mơnuih ƀôn sang” amăng pơsir hră pơ-ar ƀơi plơi pla pô.

 “Lơm kâo nao ngă hră pơ-ar ƀơi ƀirô ngă hră pơ-ar să. Kâo ƀuh anun lĕ tơlơi thâo bruă hăng bơwih brơi abih pran jua mơnuih apăn bruă, mơnuih mă bruă amăng anih ngă hră pơ-ar mơ̆ng să. Lơm mơnuih ƀôn sang hmâo tơlơi kiăng rơđah lăi pơthâo nao rai kơ hơdôm hră pơ-ar lĕ amra lăi pơthâo ƀơi anăp amăng grŭp Zalo”.

Hrŏm hăng hơdră “Plăng Zalo tô nao rai abih bang mơnuih ƀôn sang”, hơdôm hrơi rơgao, hơdôm hơdră kah hăng: “Hrơi 3 pơdah tui tlôn”, “Hrơi ƀu čih”, “Hrơi ƀu ƀuăn hlâo” dưi hmâo hơdôm anih anom amăng tơring čar Dak Lak pok pơhai pioh ngă amuñ bruă ngă pơ-ar. Lơm mơnuih ƀôn sang nao ƀơi anih “Sa bah amăng” pioh ngă hră pơ-ar, pơsit hră pơ-ar; ngă hră pơ-ar pơdô̆ rơkơi bơnai; ngă hră pơsit hrơi tơkeng ană hăng ngă hră lăi pơthâo mơnuih djai amra dưi pơsir ƀơi anun mơtăm hăng glông hơdră 5 yak: lăi pơthâo brơi, tŭ mă, pơsir brơi, pơsit hăng brơi glăi hră pơ-ar ngă. Yă Nguyễn Thị Thúy Sinh, mơnuih mă bruă ƀơi Anom bruă jŭ yap Jơnum min mơnuih ƀôn sang să Ea Yông, tơring glông Krông Pač, tơring čar Dak Lak brơi thâo:

 “Jơnum min mơnuih ƀôn sang să hmâo ngă tui laih lu hơdră pioh pok pơhai truh mơnuih ƀôn sang. Gum hrŏm hăng grŭp črâo ba akô̆ bruă 06, grŭp crâo ba pơplih hră pơ-ar pok pơhai hơdră “1000 čô mơnuih mrô” ƀơi să Ea Yông. Mơnuih ƀôn sang lơm nao lăi pơthâo ngă hră pơ-ar ƀơi plơi pla pô lĕ amra nô̆p mă hră pơ-ar mơ̆ng ataih pioh plai ƀiă prăk apah hăng hrơi mông”.

Bruă pok pơhai hơdôm hơdră hmâo hrŏ trun laih hrơi mông pơsir sa dua mơta hră pơ-ar gưl să, phường. Mơnuih ƀôn sang kơnong kơ nao mă sa wot, dô̆ tơguan amăng ƀiă hrơi mông pioh mă hră pơ-ar ngă giong. Hơdôm hơdră anai ƀu djơ̆ kơnong kơ djru pơđĭ tui mrô hră pơ-ar gưl să, phường dưi pơsir djơ̆ hrơi pơkă, djru mơnuih ƀôn sang, anom bơwih ƀong hrŏ trun hrơi mông, prăk apah amăng ngă hră pơ-ar ôh mơ̆, ñu dô̆ pơdŏng khul mơnuih apăn bruă, mơnuih mă bruă hmâo pran jua gơgrong, ai hơtai mă bruă klă dong. Ơi Nguyễn Thanh Vũ, Khua Jơnum min mơnuih ƀôn sang tơring glông Krông Ana lăng ƀuh:

 “Bruă pơplih pơčeh phrâo amăng ngă tui bruă pơsit hră pơ-ar, khua hơdôm bôh ƀirô črâo ba na nao pel ĕp, pơtrut pơsur, mơnuih apăn bruă, mơnuih mă bruă ngă tui bruă jao djơ̆ phiăn, tơlơi pơkă, hơdră mă bruă mơ̆ng ƀirô anom bruă hăng pơsit lăi nao mơ̆ng mơnuih ƀôn sang kơ pran jua mă bruă ăt kah hăng čơkă jum mơnuih ƀôn sang mơn”.

Tui hăng tơlơi pơsit ƀơi “Jơnum klah čun ƀơƀiă 9 blan kơ bruă pơplih ngă hră pơ-ar mơ̆ng tơring čar Dak Lak thun 2023”, bruă pơphun ngă ha amăng plĕ, khut khăt mơ̆ng hơdôm jơnum min, gơnong bruă, anom bruă hơdôm hrơi rơgao hmâo djru laih bruă pơplih pơkra hră pơ-ar mơ̆ng tơring čar dưi pơplih phrâo klă, djru klă hloh tơlơi kiăng mơ̆ng mơnuih ƀôn sang hăng anom bơwih ƀong. Bruă tŭ jum, pơsir hră pơ-ar gah rơwang wai lăng mơ̆ng tơring čar dưi ngă tui klă, hrŏ trun tơlơi ngă kaih amăng pơsir hră pơ-ar; ngă tui tơpă bruă rơkâo tơlơi păp ñai mơnuih ƀôn sang, khul grŭp lơm pioh hmâo tơlơi kaih. Mrô yap brơi ƀuh, bôh tơhnal pơsir hră pơ-ar djơ̆ hrơi pơkă, hlâo kơ hrơi pơkă ƀơi tơring čar hmâo mrô rơbêh kơ 99%. Kiăng tô̆ tui hăng ba tơbiă tơhnal bruă “Mă mơnuih ƀôn sang hăng anom bơwih ƀong ngă phun pioh bơwih”, ơi Nguyễn Tuấn Hà, Kơ-iăng Khua Jơnum min mơnuih ƀôn sang tơring čar Dak Lak pơtŏng sit:

 “Pơ̆ anăp anai amra pơphun sa Jơnum pioh ĕp glăi rơnoh bruă ăt kah hăng tơlơi tơnap juăt bưp pioh hmâo tơlơi črâo ba pơtlaih tơnap. Dua lĕ pel ĕp glăi mrô yap pioh tŭ ư hrŏm mrô hră pơ-ar dưi lăi pơthâo rơđah hluai tui djă pioh mơ̆ng lŏn ia. Tlâo lĕ git gai pơphô brơi kơ Jơnum min mơnuih ƀôn sang tơring čar hră pơ-ar črâo ba pok pơhai hơdôm bruă jao pơplih ngă hră pơ-ar mơ̆ng ră anai truh abih thun 2023. Pơsit abih bang hơdôm bruă bơwih buang lăng mơ̆ng ataih pioh mơ̆ng anun ruah mă hơdôm bruă ngă sit nik, rơnoh mă yua lu, nao hrŏm hăng tơlơi kiăng rim hrơi mơ̆ng mơnuih ƀôn sang, anom bơwih ƀong”.

Bruă Dak Lak pơsit pran pơtrut kơtang pơplih ngă hră pơ-ar dưi lăng yak pơplih yôm phăn, pơjing jơlan kơ tơring čar pơđĭ kyar tañ hăng kơjăp phik, lăp djơ̆ tơlơi kiăng pơđĭ kyar hrŏm tui Tơlơi pơtrun pơsit mrô 23 lơ 06/10/2022 mơ̆ng Ding jum kơđi čar kơ jơlan gah pơđĭ kyar bơwih ƀong – mơnuih mơnam hăng pơhlôm pơgang lŏn ia, rơnuk rơnua plơi pla kual Dap Kơdư truh thun 2030, tơhnal lăng nao truh thun 2045./.