Đại tá Đinh Văn Hưng, ding kơna apăn bruă ping gah tơring čar, khua gum bruă kơđi čar anom bruă khua tơhan tơring čar Dak Lak lăi pơtong, Blah dưi ƀơi Ƀuôn Ma Thuôt lĕ sa gru bơngač biă mă mơ̆ng pran jua kơsung blah khin hơtai, tơlơi pơmin kơjăp kơtang biă mă mơ̆ng ling tơhan hăng mơnuih ƀôn sang dêh čar ta.

Laih anun rơkâo ƀing khua mua, ling tơhan amăng tơring čar ăt djă pioh, kiăo tui tơlơi khin hơtai gru grua đưm adơi ayong anong wa đưm nao hlâo, kiăng gir run hloh pơtop hrăm blah ngă, ngă kơtang rơjang drơi jăn, prăp lui blah ngă, pơgang lŏn ia, akŏ pơdong khul ling tơhan dưi kơtang, ngă djơ̆ bruă mă jao amăng rơnuk phrâo.

Hlâo pơsat tơhan djai pơsăn drơi jăn yua kơ lŏn ia tơring čar-anih hơmâo 2.300 čô tơhan pơdơi pơdă ƀơi anai, amăng mông ngă yang čuh ñang h’ŭ abih pran, ƀing khua mua hăng ƀing pơ ala nao hrŏm dưm guang bơnga, h’ŭ kơ ƀing tơhan djai pơsăn drơi jăn kơ lŏn ia ƀơi gong kut hơdor kơ ƀing tuh drah pơčah asar đưm hlâo laih anun hơdor tơngia kơ ƀing khin hơtai djai pơsăn drơi yua kơ bruă hơkrŭ pơklaih rơngai lŏn ia, dêh čar dưi pơlir truh kih jing sa. Tŏ tui dơ̆ng, grup khua mua nao čuh ñăng ƀơi anom gru gưl dêh čar wai lăng ƀơi sang mơnă đưm Ƀuôn Ma Thuôt-anih ayăt krư̆ kơđol lu khua mua, tơhan ngă hơkrŭ dêh čar ta lơ̆m akŏ thun amăng rơnuk thun tal XX laih anun jing anih akŏ pơjing khul git gai ping gah blung a tơring čar Dak Lak hơđăp.