Prăk tuh pơ alin mơ̆ng 7 boh sang hră đom lăm dŏ ƀong huă đih pơdơi gưl sa hăng gưl dua ƀơi hơdôm boh să gah Yŭ tơring čar Gia Lai jing rơbêh 1.500 klai prăk, hơmâo man pơdong ƀơi anih prong giăm 52 hektar. Tơring čar ngă giong hăng jao glăi kơ abih bang 7 boh sang hră, hlâo lơ 31/7/2026. Khă hnun, ră anai kơnong sa boh sang hră Ia Puč đôč hơmâo man giong tui hrơi pơkă, bơ 6 boh sang hră dŏ glăi kaih soh pơhmu hăng hrơi pơkă năng blung. Yua dah anom bruă kač gru pơkra sang ngă kaih, ƀu hơmâo mơnuih mă bruă, laih dong nua pơtâo čuah giăm anai pơmă mơn.

Mơ̆ng bruă pel ĕp bruă mă, Khua ping gah tơring čar Gia Lai ơi Thái Đại Ngọc kiăng pô tuh pơ alin hăng pô gơgrong man pơkra hơmâo lu ƀiă mơnuih mă bruă, pơsir hĭ anŏ tơnap, đah mơ̆ng ngă bruă tañ ƀiă. Hơdôm gơnong bruă ngă hrŏm pơklaih brơi tơlơi tơnap kơƀah pơtâo čuah, pơhlom dưi man pơdong tañ giong, mă yua sang hră amăng thun hrăm phrâo. Laih dong lăng glăi abih, pơhrua tui ring bruă kiăng pơhlom mă yua klă, pla phun kyâo mơtah, anih dŏ pơdơi kơ ƀing nai, hăng ƀing čơđai, hrŏm hăng măi pơkra djah asuk lăp djơ̆.