Ngă bruă hăng Khul khua apăn bruă ping gah tơring čar Khánh Hòa, Ding kơna Ding jum kơđi čar, ding kơna git gai Ping gah, Khua Jơnum min Pel ĕp bruă mă mơ̆ng Ping gah ơi Trần Sỹ Thanh lăi, bruă pok pơhai Tơlơi pơtrun jơnum ping gah tơring čar Khánh Hòa khŏm nao hrŏm hăng Tơlơi pơtrun Jơnum ping gah dêh čar tal 14; Khánh Hòa ƀu kơnong ngă tui đôč ôh, ăt khŏm thâo ngă mă pô, pơčeh phrâo, krăp lăng ƀu djơ̆ či “hơmâo mă anŏ soh ôh”, bruă anai lĕ tơlơi gum hrŏm, hmao kru pơsir brơi anŏ tơnap, pơsir đut hlao hơdôm kơčăo bruă ngă kaih, dŏ đom sui, mơ̆ng anun kiăng đĭ kyar amuñ ƀiă. Khua jơnum min pel ĕp, krăp lăng mơ̆ng Ping gah ơi Trần Sỹ Thanh pơtă pơtăn, kiăng hơmâo rơnoh đĭ kyar 2 mrô, ƀu djơ̆ bruă ta iâu pơthưr đôč ôh, khŏm ngă tong ten, rơđah pô ngă, rơđah bruă mă, rơđah hrơi pơkă hơmâo ngă bruă dơ̆ pă; pơtrut tui bruă pel ĕp, krăp lăng nao hrŏm hăng pơkă lăng anŏ tŭ yua mrô rơnoh đĭ kyar. Laih dong pơtrut kơtang tui bruă pơplih anom bruă kơnuk kơna klă hloh, bang hyu pran jua ngă bruă tui Tơlơi pơtrun hăng abih bang khua mua, mơnuih ping gah hăng abih bang mơnuih ƀon sang, pơplih rơđah amăng bruă mă. Ơi Trần Sỹ Thanh lăi: “Amăng tơlơi lăi pơthâo pel ĕp bruă mă ta khŏm ngă rơđah hăng pơkă rơnoh gum pơgôp đĭ kyar mơ̆ng Khánh Hòa hơdôm %, čang rơmang tui anun lĕ klă hloh. Ƀu djơ̆ črâo pơƀuh, črâo pơƀuh hai ăt kiăng ngă klă hloh mơn. Mơ̆ng anun gum ĕp jơlan ngă bruă, pơsir hĭ hơdôm bruă hơmâo, ba tơbiă hơdră ngă bruă rơđah đah mơ̆ng dưi hơmâo rơnoh đĭ kyar 10%. Pơsir hĭ bruă ta kiăng ngă hơget? Tơring čar ngă hơget? Gơnong dlông ngă hơget? Hlơi pô krăp lăng bruă ta ngă laih anun truh hrơi hơbin? Ƀu dưi lăi hrŏm hrŏm đôč ôh, khŏm hơmâo hrơi mông, jao bruă rơđah rơđông”.

Ơi Nghiêm Xuân Thành, Khua git gai Ping gah tơring čar Khánh Hòa brơi thâo, tơring čar ngă tui klă, pok pơhai Tơlơi pơtrun jơnum ping gah dêh čar tal 14 hăng hơdôm jơlan hơdră ngă bruă, pơhlom djơ̆ hrŏm ha amăng plĕ mơ̆ng tơring čar truh pơ să phường. Tơring čar gir kiăng hơmâo rơnoh đĭ kyar 2 mrô, ngă bruă tui tơlơi kiăng khăp, tơlơi čang rơmang akŏ pơdong tơring čar jing ƀôn prong yua Gơnong dlông wai lăng phun tui Tơlơi pơtun mrô 09-NQ/TW mơ̆ng Ding jum kơđi čar.

Ngă bruă hăng Khul apăn bruă Ping gah tơring čar Gia Lai, Ding kơna Ding jum kơđi čar, Khua ding jum pơtom hiăp ơi Lê Hoài Trung lăi dlăm, bruă pel ĕp, krăp lăng kiăng pơhlom ngă djơ̆ djŏp Tơlơi pơtrun, Tơlơi pơčrâo trun mơ̆ng Ping gah dêh čar hơmâo pok pơhai ngă klă, tơpă sit, tŭ yua, djơ̆ jơlan ngă bruă. Amăng hrơi mông djŏp gưl ping gah glăk pơƀut ngă Tơlơi pơtrun jơnum ping gah dêh čar tal 14 hăng prăp či ruah khua, bruă anai jai kiăng ngă ječ, ngă hmao tlôn mơtăm. Tơring čar Gia Lai kiăng lăng yom bruă pel ĕp bruă ngă tui rơnoh đĭ kyar dua mrô; pok pơhai tơlơi pơtrun gong gai dua gưl; hrŏm hăng hơdôm Tơlơi pơtrun đĭ kyar bruă akŏ phun tui tơlơi git gai mơ̆ng Gơnong dlông hăng mơ̆ng tơring čar. Khua khul pel ĕp bruă mă kiăng tơring čar Gia Lai jao bruă kơ anom bruă pơtruh brơi, ngă hrŏm hăng Khul; čih glăi hră lăi pơthâo bruă mă tơpă sit, lăi rơđah anŏ tơnap, tơlơi dŏ gun hăng ba tơbiă hơdră pơsir tong ten.

Ngă bruă hăng Khul khua apăn bruă tơring čar Dak Lăk, ơi Nguyễn Thanh Nghị, Ding kơna Ding jum kơđi čar, Ding kơna git gai Ping gah, Khua anom bruă čih pơkra hơdră djru - hơdră ngă bruă Ping gah, Khua khul brơi thâo, bruă pel ĕp krăp lăng jing bruă ngă na nao či pơtŏng djơ̆, tơpă, ƀuh anŏ klă, tŭ yua, pơčeh phrâo či pơtrut tui; črâo pơƀuh anŏ aka ƀu dưi, ƀu djơ̆ đah mơ̆ng tañ pơsir, laih dong čih pioh hơdôm tơlơi tơnap, tơlơi gun amăng bruă pok pơhai ngă tui tơlơi pơtrun mơ̆ng Ping gah: “Kâo kiăng ƀing gih ngă bruă ječ ameč, git gai čih pơkra djŏp hră pel ĕp wai lăng tui hăng boh tơhnal akŏ phun laih dong ăt hrŏm hăng anun lĕ brơi nao hơdôm hră pơ-ar hăng git gai hơdôm anom bruă, mơnuih ngă bruă bơdjơ̆ nao ngă hrŏm kjăp hăng khul. Hăng hră lăi pơthâo bruă khŏm pơhlom djŏp, tơpă sit, hơmâo mrô pơƀuh brơi, ƀu dưi lăi hrŏm đôč ôh, laih dong kiăng pơsit rơđah anŏ găl, aka ƀu dưi ngă, phun tơhnal ăt kah hăng ba tơbiă hơdră pơsir. Hơmâo tơlơi hơget thơ dŏ gun, ƀing gih lăi pơthâo glăi mơtăm kơ khul khua či pơƀut glăi lăi pơhmư hăng Ding jum kơđi čar sem lăng”.

Khul pel ĕp hơdôm tơlơi akŏ phun kah hăng: bruă pơphun hăng tơlơi ngă bruă mơ̆ng hơdôm anom bruă ƀơi tơring čar tơdơi kơ ngă tui gong gai dua gưl; hơdôm bruă mă, hơdră pơhlom ngă tui rơnoh đĭ kyar gơnam pơkra amăng rơwang thun 2026-2030 mơ̆ng 10% truh kơ hloh, tui hăng Tơlơi pơtrun jơnum ping gah dêh čar tal 14; bruă git gai črâo bruă ngă tui Tơlơi pơtrun mrô 57 mơ̆ng Ding jum kơđi čar đĭ kyar boh thâo ia rơgơi hloh dong, pơčeh phrâo, mă yua boh thâo mrô dêh čar.

Mơ̆ng pel ĕp, krăp lăng, hơdôm grup mă bruă mơ̆ng Ding jum kơđi čar, Khul khua git gai ping gah kiăng pơtŏng sit nik bruă pok pơhai ngă tơlơi pơtrun, tơlơi črâo bruă mơ̆ng Gơnong dlông ƀơi tơring čar amăng kual Dap Kơdư hăng Dơnung Tong Kra; tañ ƀuh hơdră ngă bruă tŭ yua đah mơ̆ng ngă ƀơi lu anih, laih dong pơklaih brơi tơlơi gun, anŏ tơnap, pơhlom djŏp tơlơi pơtrun prong mơ̆ng Ping gah hơmâo ngă ƀơi abih bang, khut khăt, gir kơtir, djru đĭ kyar bơwih ƀong huă - mơnuih mơnam hăng ngă giong djŏp rơnoh pơkă tui Tơlơi pơtrun Ping gah dêh čar tal 14./.