Tơhan pơgang guai dêh čar tơring čar Dak Lak pơtong rơđah, ngă giong bruă mă plĕ hră ruah khua hlâo, tañ  hloh, laih anun pơgang tong ten tơlơi rơnuk rơnua hơđong amăng tal plĕ hră ruah khua. Grup hyu mă bruă mơ̆ng Khul khua mua anom bruă tơhan pơgang guai dêh čar tơring čar Dak Lak nao sem lăng djop puih kơđông, anih plĕ hră tañ kah hăng: Puih kơđông Ea Hleo, Ia Rvê, Yok Mbre, Serepok, Bo Heng, Yok Đôn, amăng jang guai dêh čar Dak Ruê hăng puih tơhan pơtop hrăm bruă tơhan blah ngă .

Ƀơi anom nao sem lăng, grup khua mua hơmâo hmư̆ lăi pơthâo tơlơi pơhing boh tơhnal ngă tui, bruă jao prăp rơmet ruah khua, amăng anun pơtum nao kơ bruă sem lăng tong ten djop pok hră pơtrun mơ̆ng khua mua pơdlông; bruă hyu pơtô pơblang, pơtô ba tơlơi phiăn ruah khua, brơi kơ ƀing khua mua, ling tơhan hăng mơnuih ƀôn sang amăng kual giăm guai thâo; bruă mă pơgang tơlơi rơnuk rơnua, hơđong amăng anih plĕ hră ruah khua; prăp lui gơnam yua mă bruă, prăp lui amăng kual plĕ hră, kơthung hip plĕ hră hăng hip pioh hră pơar prăp lui kơ bruă plĕ hră ruah khua. Khom pơhrôp hiam djơ̆ tơlơi phiăn.

Hăng djop puih kơđông plĕ hră hlâo, tañ hloh, grup hyu mă bruă hơdai gum hrŏm djop sang bruă ping gah, gong gai kơnuk kơna plơi pla, kiăng ngă klă bruă prăp lui, pơhlom hơđong anih plĕ hră ruah khua kiăng djơ̆ tơlơi phiăn; prăp lui djop  hăng ngă gêh găl brơi khul ba hyu hip plĕ hră tơl sang amăng kual giăm guai, djru ba ƀing khua mua, ling tơhan dŏ gak mă bruă sa anih hrơi mlam pioh pơgang guai dêh čar, kiăng abih bang lêng kơ dưi plĕ hră ruah khua djơ̆ hăng tơlơi phiăn.