Tui hăng tơlơi lăi pơthâo, amăng hrơi mông anih sĭ ia jâo ƀơi rŏng lŏn tơnah glăk tơnap, ngă tui tơlơi git gai mơ̆ng Kơnuk kơna, hơdôm ding jum, anom bruă gum ngă bruă, biă ñu lĕ Ding jum pơkra gơnam sĭ mơdrô, kiăng pơhlom hơđong nua ia săng ia jâo. Grup wai lăng apui yua ia jâo čih pơkra hơdră ngă hơđong hăng rơnuk rơnua ia săng ia jâo amăng blan 3, prăp lui kơ hơdôm bruă kiăng ngă pơ anăp dong.

Pơhiăp ƀơi mông jơnum, Khua dêh čar ơi Phạm Minh Chính lăi, khŏm pơhlom brơi apui yua ia jâo hơmâo djŏp, ƀu dưi kơƀah ôh mah hơmâo tơlơi rung răng hơget tŭ mơn. Khua dêh čar čih hră mơit nao hăng pơhiăp tom laih hăng khua mua bơdjơ̆ nao apui yua ia jâo; pơtrut pơtom hiăp bruă apui yua amăng hrơi glăk tơnap tap; hơdôm ding jum, anom bruă ngă bruă gir biă mă yơh, ĕp anih či blơi; laih dong ngă hră pơtrun djru ngă hơđong nua ia săng ia jâo. Khua dêh čar kiăng ĕp hơmâo lu anih či blơi mă ia jâo mơñă; pok pơhai ngă tui hlao bruă pơhiăp tom mơ̆ng Khua dêh čar hăng hơdôm boh dêh čar kah hăng UAE, Kuwait...kiăng hơmâo lu anih sĭ kơ ƀing ta, pơhlom 30% ia săng ia jâo dưi blơi mut.

Amăng mông anai, Khua dêh čar iâu pơthưr mơnuih ƀôn sang anăm bral, bơngơ̆t đơi ôh. Abih bang gum pơgôp, găn rơgao tơnap tap, anăm luh nao blơi pơđom lui ia săng ia jâo mơ̆ ngă rung răng anih mơdrô, hnun amuñ hơmâo pô bong lui gơnam, sĭ pơmă hloh...Khua dêh čar jao kơ Ding jum pơkra gơnam sĭ mơdrô pơƀut sem lăng pơphun ngă bruă pioh pơđom ia jâo dêh čar; dưi prăp mă pô apui yua ia jâo kơ lŏn ia; Ding jum prăk kăk brơi prăk či pơhlom hơmâo djŏp apui yua ia jâo./.