Mơ̆ng hơpluh hrơi hlâo kơ anai laih, ayong Nguyễn Xuân Lộc, dŏ pơ tơring đăo Ea Tul, să Ea Tul, tơring glông Čư̆ Mgar hrŏm hăng mơnuih ƀôn sang đăo amăng tơring gum hrŏm pơhrôp hiam plơi pla, jơlan glông, sang jơnum ta juăt sang ơi adai kah hăng pơhrôp hăng bơnal ia iom, dưm hmlơi kô̆, ƀlir hrĕ, dăng apui pul hrĕ apui lơtrik, pơjing rơ-ưng pơtâo, phun kyâo hơngô ƀơi sang jơnum ƀudah rim sang anŏ, kơnung djuai. Pô dưm truă pul apui lĕ, ngă bruă ñu, pô hơdui hrĕ apui, pơhrêp pưk sang đang war ngă kơ ñu, pô pơdong amăng jang djru pơdong amăng jang, djop pô phara ba bruă ngă yơh, dik dăm mơtam.

“Amăng hrơi mông mơak hrơi Noel truh kâo hrŏm hăng abih bang mơnuih ƀôn sang đăo ƀơi Ea Tul hơmâo pơhrôp glăi hiam amăng rơ-ưng pơtâo ngă mă čơkă Noel, pioh kơ abih bang čơkă hrơi Noel mơak mơai, rơnuk rơnua, rơgoh hiam, kâo ƀuh bruă ngă anun mơak biă mă!”.

Hrơi blan anai, mah gun lu bruă mă pưk hmua, pĕ kơphê aka giong, samơ̆ mơnuih ƀôn sang đăo pơ anai ăt pioh mông prăp lui čơkă Noel mơak klă, prăp lui ngă pơhiam sang anŏ gŏ uă, čơkă hrơi khua yang tơkeng rai laih anun čơkă thun phrâo. Amai H’Hly Ktla, să Ea Tul, tơring glông Čư̆ Mgar hok mơak lăi, thun anai rơnoh kơphê đĭ đăi ƀiă, laih anun lu pơjeh boh troh pơkŏn ăt đĭ nua ƀiă soh, mơnuih ƀôn sang ngă hmua pơhrui glăi plai plăi, anun yơh čơkă hrơi Noel hăng pran jua hok kơdok biă mă:

“Thun anai sang anŏ gơmơi hơmâo prăp lui bruă pơkra rơ-ưng pơtâo ngă mă rup pioh čơkă hrơi khua yang tơkeng rai. Thun anai phara hăng rim thun yua nua kơphê đĭ ƀiă, anun yơh tơlơi mơak prong biă mă thun anai, djop pô ƀuh tui anun soh”.

Khua ơi khop Hoàng Nguyên Vũ tơring đăo Ea Tul brơi thâo, hrơi Noel thun anai mơnuih ƀôn sang đăo hok mơak lu hloh yua sang jơnum dưi hơmâo tuh pơ alin man pơdong phrâo. Prăp lui hrơi Noel thun anai, mơ̆ng akŏ blan 12 mơtam, mơnuih ƀôn sang đăo hrŏm hơbit djru pran jua, hrơi bruă, gum hrŏm khua ơi khop wai lăng tơring đăo, ƀing ngă bruă amăng sang jơnum hơmâo prăp rơmet tong ten pioh čơkă Noel mơak mơai rơnuk rơnua, tong ten, kiăng pơdah rai pran jua pơpŭ bơni kơ khua yang, khăp kơ lŏn ia, gum pơgôp djuai ania.

“Noel thun anai hơmâo prăp rơmet anŏ pơhrôp glăi ngă anih ngui ngor mơak hiam, čơkă hrơi khua yang tơkeng pioh jơnum kơkuh pơpŭ. Hăng mơnuih ƀôn sang lĕ mông jơnum prong mơak pran jua ăt ngă tui tong ten. Biă mă ñu ƀơi Ea Tul lĕ djop sang anŏ hơmâo pơhrôp hiam soh kiăng mơak Noel, pran jua hok kơdok soh. Thun anai, dưi hơmâo gong gai kơnuk kơna djop gưl brơi man pơdong anih jơnum, sang ơi adai ngă phrâo, anai yơh tơlơi mơak prong mơ̆ng mơnuih ƀôn sang, djop pô hik hăk pran jua čơkă hrơi anai, pơkra ming mă anih jơnum, man pơdong sang ơi adai, ƀu hơmâo apah arăng mă bruă ôh”.

Tơring glông Čư̆ Mgar hơmâo 5 boh tơring đăo, 2 phung wang kơnung djuai đăo hăng sa boh anih jơnum kơkuh pơpŭ, ơi Vũ Hồng Nhật, Khua Jơnum min mơnuih ƀôn sang tơring glông Čư̆ Mgar, brơi thâo, bơyan Noel thun anai, tơring glông hơmâo akŏ pơjing 5 khul hyu čuă jơmư pơpŭ kơ hrơi mơak anai ƀơi djop sang jơnum, tơring đăo, bơni hơ-ơč kơ khua mua, pô pơtô, wai lăng tơring đăo hăng ƀơk gơnam pơyơr mơak hrŏm. Laih dơ̆ng, gitgai djop să, tơring kual iâu pơthưr ƀing pơdrong, ngă bruă sĭ mơdrô djru hrŏm pioh hyu čuă hăng ƀơk gơnam kơ sang anŏ mơnuih ƀôn sang đăo tơnap tap čơkă hrơi Noel mơak mơai rơnuk rơnua:

“Bơyan Noel thun 2023 anai, Jơnum min mơnuih ƀôn sang tơring glông git gai brơi djop să, tơring kual hơmâo sang jơnum djop tơlơi đăo brơi đing nao kơ mơnuih ƀôn sang čơkă Noel djop, rơnuk rơnua hăng pran jua mơak djơ̆ tơlơi phiăn kơnuk kơna pơkă hăng boh nik ñu djru ba sang anŏ ƀing đăo dŏ tơnap tap, ƀun rin hơmâo jơlan hơdră lăng ba mơak hrơi khua yang tơkeng rai kiăng trơi pơđao, rơnuk rơnua”.

Ơi Dương Văn Tuệ, Kơ-iăng Khua Jơnum min Gum pơgôp đăo khop tơring čar Dak Lak brơi thâo, đơ đam tơring čar hơmâo 100 boh anih jơnum kơkuh pơpŭ hăng 217.000 čô mơnuih đăo. Thun 2023 tơlơi hơdip mơda ƀing đăo khop amăng tơring čar hơmâo lu tơlơi pơblih ƀiă. Djop bruă mă djru ba tơlơi khăppap; hơdră pơgang ba tơlơi rơnuk rơnua hơđong amăng kual jơnum tơring đăo, kơnung djuai đăo; bruă ngă “Abih bang mơnuih ƀôn sang gum pơgôp man pơdong plơi pla phrâo hăng ngă tui anŏ rơguăt plơi prong”...lêng kơ hơmâo mơnuih ƀôn sang đăo khop hok mơak ngă tui laih anun djru hrom pran jua dram gơnam man pơdong plơi pla tơring čar Dak Lak ƀrư̆ hrơi pơdrong sah hiam mơak.

“Thun 2023 mơnuih ƀôn sang đăo khop hơmâo bơkơtưn mă bruă pioh pơtrut bơwih ƀong huă pơđĭ kyar tơlơi hơdip mơda đĭ tui sang anŏ. Anŏ mơak čơkă Hrơi Noel hlăk dik dăk djop anih, plơi pla, tơring đăo hăng ƀut plơi mơnuih ƀôn sang dŏ amăng tơring čar. Sa mông mơak čơkă Noel lar hyu bă hră amăng tơring čar, amăng pran jua mơnuih ƀôn sang plơi prong ăt kah hăng kual ataih braih gui hai”.

Sa bơyan Noel dơ̆ng truh laih yơh hăng tơlơi mơak mơai kơdok kơdor amăng pran jua abih bang mơnuih ƀôn sang Dak Lak. Djop pô lêng kơ anăp nao iâu lăi, čang rơmang hăng dŏ tơguan sa bơyan Noel rơnuk rơnua mơak, sa thun phrâo dơ̆ng truh bă hăng tơlơi đăo kơnang hyuk hyak mơak hloh amăng tơlơi hơdip mơda bruă mă dŏ dong ƀong huă.