Hăng akŏ tơlơi pia “Hlăk ai kơsung nao pơ anăp, pơyơr pran jua yua tơlơi hơdip mơnuih ƀôn sang plơi pla”, lu bruă mă dưi pơphun amăng đơ đam tơring čar kah hăng Hrơi tơjuh mơtah mơda, hrơi tơgŭ ngă bruă pơyơr pran jua man pơdong plơi prong thâo rơgơi, pơphun mă bruă hyu pơtô ba pơblih yua mrô kơ ană plơi pla thâo. Khul pơlir hơbit hlăk ai Việt Nam tơring čar Dak Lak brơi thâo, rơgao 3 wơ̆t hrơi tơjuh pok pơhai ngă tui bruă mă amăng Blan hlăk ai, hơmâo 220 grup hlăk ai pơyơr pran jua, ngă tui 200 ring bruă, črăn bruă ƀơi djop plơi pla ala ƀôn.

Giăm 160 grup pơtô ană plơi pla hrăm hră, djru pơtô ba tơlơi thâo phrâo ba yua gơnam mă bruă rơnuk anai kơ ană plơi pla. Hlăk ai đơ đam tơring čar hơmâo djru prăk kăk, rhơi bruă man pơdong 25 boh sang amăng bruă gum tơngan hrŏm man pơdong sang tơ̆i, sang răm. Hrŏm hăng anun, hlăk ai amăng tơring čar pok pơhai ngă tui Hră pơtrun mrô 57-NQ/TW mơ̆ng Ding jum kơđi čar kơ bruă pơđĭ tui boh thâo ia rơgơi, ba yua anŏ pơčeh phrâo hmar laih anun pơblih yua mrô ƀơi dêh čar.