Jơnum đing nao hruă kjăp hơdôm boh tơhnal yôm phun bơdjơ̆ nao jơlan gah pơđĭ kyar bơwih ƀong huă-mơnuih mơnam amăng ƀon lan, tơlơi yôm hloh lĕ jơlan hơdră bruă mă ngă tui tơlơi pơtrun mơng Jơnum tal XIV mơng Ping gah hăng hơnong pơkă pơđĭ kyar rơwang thun 2026-2030, anăp nao truh thun 2045. Ƀing khua mua ăt lăi pơthâo boh tơhnal kơ pơđĭ kyar bơwih ƀong huă dêh čar tui tơlơi pơtrun mrô 79 mơng Ding jum kơđi čar, hrŏm hăng bruă jao pơplih ngă hră pơ-ar, pơđĭ kyar gru grua-mơnuih mơnam.

Đĭ pơhiăp pơđut mông mă bruă, Khua git gai Ping gah tơring čar Dak Lak ơi Lương Nguyễn Minh Triết rơkâo djop gưl, gơnong bruă tañ pơtong hăng akŏ bruă tong ten, hrưn đĭ tơlơi glăm ba mơng ƀing apăn akŏ, bơtŭ ư pok pơhai hơdôm bruă jao tui tơlơi git gai mơng gơnong glông hăng mơng tơring čar.