VOV4.Jarai-Kiăng pơkă glăi djơ̆ hnong bruă ngă kaih pơkă kăng bruă yua lŏn, akŏ bruă yua lŏn tơnah anai lĕ tơlơi rơkâo mơ̆ng Khul pơ ala mơnuih ƀôn sang tơring čar Dak Lak lơ̆m mông mă bruă hăng Jơnum min mơnuih ƀôn sang tơring čar kơ bruă ngă tui jơlan hơdră mă yua lŏn tơnah mơ̆ng thun 2016-2021, Jơnum min mơnuih ƀôn sang tơring čar Dak Lak hơmâo pơsit yua lŏn mơ̆ng thun 2021-2030 mơ̆ng 13/15 boh tơring glông. Ră anai, dŏ 2 boh anom bruă aka pơkă giong bruă yua lŏn anun lĕ plơi prong Ƀuôn Ma Thuôt hăng tơring glông Ea Sup. Kơ akŏ bruă mă yua lŏn rĭm thun ƀơi djop tơring glông, plơi prong, truh ră anai Jơnum min mơnuih ƀôn sang tơring čar hơmâo pơsit akŏ bruă yua lŏn thun 2022 kơ 6/15 boh tơring glông plơi prong, dŏ glăi 9 boh tơring glông, plơi prong aka pơsit ôh.

Djop sang bruă lăi pơthâo akŏ bruă pơkă yua lŏn hăng grup ĕp lăng bruă mă

Pơhiăp đĭ amăng mông jơnum, ơi Trần Phú Hùng, Kơ-iăng khua jơnum min pơ ala mơnuih ƀôn sang tơring čar Dak Lak, rơkâo tơring čar Dak Lak git gai djop sang bruă pơtô lăi ngă djơ̆ tơlơi phiăn kơnuk kơna kơ bruă pơkă kăng lŏn pioh mă yua; pơkra glăi, jăm ƀuah bruă ngă kaih hăng pơđĭ tui anŏ tŭ yua mă yua lŏn tơnah; tañ pơsit hĭ akŏ bruă yua lŏn kơ djop tơring glông…..Amăng anun đing nao hloh kơ bruă pơtrut tañ dăp hơdră, pơkă hnong mă yua lŏn ƀơi plơi prong Ƀuôn Ma Thuôt.

Nay Jek: Pơblang