Lu bruă bơkơtưn khăp kơ lŏn ia hmư̆ hing, bang bơngač, pơtrut pran jua mơnuih mơnam: Bruă “Dêh čar gum tơngan man pơdong plơi pla phrâo” hăng 26 boh să ngă djơ̆ hơnong, 4 boh să plơi pla phrâo tui hơnong phrâo, rơbêh 760 mơta gơnam OCOP, amăng anun hơmâo 2 mơta gơnam mă 5 asar pơtŭ. Bruă “Yua kơ mơnuih rin - Ƀu pioh lu pô hlơi gah tlôn” djru ba mrô sang anŏ rin kual mơnuih ƀôn sang djuai ƀiă hrŏ trun dŏ 9.7%. Bruă “ƀing khua, mơnuih mă bruă čar bơkơtưn ngă bruă hiam, pran jua klă” hăng “Abih bang mơnuih ƀôn sang hrăm boh thâo mrô” jing pơtrut kơtang pơplih mă yua mrô amăng anom bruă kơnuk kơna, 100% hră pơ-ar hơmâo ngă amăng glông điện tử.

Ơi Tạ Anh Tuấn - Khua jơnum min mơnuih ƀôn sang tơring čar Dak Lăk, Khua khul bơkơtưn Pah bơni tơring čar pơsit, anai jing Jơnum bơkơtưn khăp kơ lŏn ia blung a mơ̆ng tơring čar tơdơi kơ pơmut hrŏm, yom biă gah kơđi čar, kơđŏm gru blung a kơ rơwang đĭ kyar phrâo - ƀu kơnong bơkơtưn amăng rim bruă đôč ôh, ăt bơkơtưn pơplih tơlơi pơmin wai lăng hăng râu mơdưh pran hrưn đĭ mơ̆ng mơnuih ƀôn sang.