VOV4.Jarai-Tlam lơ 6/10, Jơnum min mơnuih ƀôn sang tơring čar Dak Lak jơnum hăng djop gơnong bruă, sang bruă kơnuk kơna laih anun djop tơring glông pơdjơ̆ nao, pok pơhai pơtrut tañ kơčăo bruă čuk pơkra jơlan rơdêh đuăi hmar Ƀuôn Ma Thuôt-Khánh Hòa. Kơčăo bruă anai, glông taih 117 km mơkrah, rơnoh prăk tuh pơ alin truh 22 rơbâo klai prăk. Amăng anun, črăn găn nao pơ tơring čar Dak Lak lĕ 85 km, kiăng pơdong plơi phrâo brơi kơ 300 boh sang anŏ.

Dak Lak jơnum pơtrut kơčăo bruă pơkra jơlan rơdêh đuăi hmar

Ƀuôn Ma Thuôt-Khánh Hòa

Ƀơi mông jơnum, khua mua jơnum min mơnuih ƀôn sang tơring čar Dak Lak hơmâo pơpha bruă mă tum teč kơ djop gơnong bruă, 3 boh tơring glông hơmâo jơlan anai găn nao, ngă tui bruă jao tui hăng tơlơi dưi djru duh glăi lŏn mơnuih ƀôn sang, pơdong glăi plơi phrâo, pơgang kông ngăn, ruah mă sang bruă hơmâo tơlơi dưi djru hrom ngă bruă, pơblih anih lŏn glai hlâo kơ čuk, pơdŭ đuăi gơnam tam man pơdong mơ̆ng hlâo djơ̆ găl, gong apui lơtrik. Bruă phun ƀơi anăp mơta lĕ čih pơkra dăp bruă hlâo, lăi pơthâo anŏ bơbeč kơ lŏn glai ayuh hyiăng, lăi pơthâo hlâo lơ 12/11 pơ anăp, giong anun čuk pơkra lĕ hlâo kơ lơ 30/6/2023, jơlan anai amra ngă giong amăng thun 2026, hlong ba yua amăng thun 2027.

VOV Dap Kơdư-Nay Jek: Pơblang