VOV4.Jarai - Mơguah (28/9), ƀơi plơi prong Buôn Ma Thuột, Jơnum min mơnuih ƀon sang tơring čar Dak Lak pơphun jơnum bưp ƀô̆ mơta hơdôm anom bruă djru mơng tač rơngiao ƀơi Dak Lak thun 2022. Nao jơnum hrŏm hơmâo 8 khul grup ƀơi tơring čar hăng lăng nao rai mơng ataih hăng 16 khul grup, anom bruă pơ ala dêh čar tač rơngiao ƀơi Việt Nam. Tui hăng Gơnong bruă mă tač rơngiao tơring čar Dak Lak, amăng 2 thun laih rơgao, tơring čar hơmâo pơtrut jak iâu rơbêh 6 klăk 500 rơbâo đôlar Mi tui jơlan hơdră kơtưn ngă hrŏm hăng pơsur jak iâu djru mơng tač rơngiao.

Amăng anun, yap truh blan 8 thun anai, Jơnum min mơnuih ƀon sang tơring čar hơmâo tŭ mă 51 rơnoh prăk djru hăng abih tih prăk iâu gum pơgôp giăm 3 klăk 700 rơbâo đôlar Mi. Bruă djru lu hloh lĕ ia jrao, pơtô pơjuăt, wai pơgang ayuh hyiăng, pơđĭ kyar bơwih ƀong huă- mơnuih mơnam hăng pơsir hĭ hơdôm bruă amăng mơnuih mơnam. Gah tơring čar, ơi Võ Văn Cảnh, Kơ-iăng Jơnum min mơnuih ƀon sang tơring čar Dak Lak pơsit tong, Dak Lak lêng kơ ngă gêh gal hloh kiăng hơdôm khul grup, anih anom gum djru mơng tač rơngiao gum hrŏm, djru brơi tơring čar pơ anăp anai.

Siu Đoan: Pơblang