Amăng 3 hrơi, jơnum ruah khua hơmâo 5 mơta hră lăi pơthâo, tơlơi čih ră ruai kơ bruă mă, 79 wơ̆t tơlơi pơgôp hiăp pơčrong sai, pơtum nao bruă pơƀut glăi rơwang bruă thun 2020-2025; sem glăi bruă mă, tơlơi git gai mơ̆ng khul apăn bruă ping gah hơđăp; pơtong rơđah tơhnal pơkă bruă mă, tơlơi pơblih kơtang kơ rơwang bruă phrâo; pơgôp hiăp kơ Hră pơtrun jơnum ping gah dêh čar tal XIV; pơsit Hră pơtrun hăng jơlan hơdră či ngă bruă.

Khua git gai ping gah tơring čar Dak Lak, Nguyễn Đình Trung lăi pơtong, tơdơi kơ jơnum giong, abih bang amăng ping gah pok pơhai ngă tui Hră pơtrun, pơtum nao 8 mơta bruă phun hơdră pơsir, 3 bruă pơblih kơtang, đing nao akŏ pơdong ping gah, gong gai kơnuk kơna, glông bruă kơđi čar brơi kơjăp. Amăng anun, đing nao čuk pơkra jơlan glông nao rai, pơtrut bruă tuai hyu ngui, akŏ pơjing lu anih, ƀut plơi pla, kiăng pơphun čơkă tuai, pơjing pran kơtang pơtrut tơlơi bơwih ƀong huă-mơnuih mơnam hăng gru grua hiam kơ tơring čar.