Tui hră pơkôl, dua bơnah amra gum hrŏm amăng pơjing hăng pok pơhai hơdôm akŏ bruă, hơdră bruă ngă tui kiăng pơhlôm djop apui lơtrik yua, pơkrem yua apui lơtrik hăng plai ƀiă huač apui yua; gir run rĭm thun pơkrem ƀiă biă mă ñu 2% apui lơtrik mă yua ƀơi Dak Lak. Dua bơnah amra pơtrut hơdôm bruă pơtô pơblang yua apui lơtrik pơkrem; pơphô bruă, rơkâo Jơnum min mơnuih ƀôn sang tơring čar pơpŭ bơni ƀing mơnuih, khul grup ngă tui klă hăng hơmâo hơdră pơsir hĭ hơdôm anih anom ngă soh tơlơi pơkă amăng yua apui lơtrik pơkrem.

Gơnong bruă si mơdrô hăng tuh tia pơkra ming Dak Lak hăng anom bruă apui lơtrik Dak Lak ăt tŏ tui pơphun pel ĕp, krăo lăng tơlơi sit nik mă yua apui lơtrik hăng hơdôm anih anom yua apui lơtrik phun. Blung hlâo, dua bơnah hơmâo pơphun, pok pơhai hơdôm tal pơplông “Sang anŏ yua apui lơtrik pơkrem thun 2024”, hăng hơnong pơkă pơjing rup rap tơlơi hơdip mơtah, agaih, hiam klă hluai tui bruă yua apui lơtrik hơđong, tŭ yua, pơkrem.