Lăi pơthâo glăi ƀơi mông ngă bruă, ơi Lương Nguyễn Minh Triết, Khua ping gah tơring čar dak Lăk brơi thâo, bơwih ƀong huă - mơnuih mơnam kŭi I hơđong hăng hơmâo lu tŭ yua mơn. Bruă bơwih ƀong hơmâo pok prong, GRDP tui nua ră anai hơmâo rơbêh 48.400 klai, đĭ 11,7% pơhmu hăng tơđar thun 2025.

Khă hnun, rơnoh đĭ kyar GRDP, tơring čar glăk hơmâo năng ai 7,5% đôč; prăk brơi či tuh pơ alin kaih; bruă duh lŏn, čuk pơkra ăt dŏ tơnap; bruă pơkra hră pơ-ar aka ƀu tañ ôh; bruă sĭ mơdrô bưp lu tơlơi tơnap.

Khua ping gah tơring čar Dak Lăk lăi, kiăng dưi hơmâo rơnoh đĭ kyar 10% truh pơngŏ, kiăng hơmâo lu prăk biă pơ anăp anai, rơgao kơ prăk hơmâo mơ̆ng tơring čar. Yua hnun,  tơring čar kiăng Gơnong dlông tañ iâu pơthưr anom bơwih ƀong mơnuih ƀôn sang ngă pô, dưi čan prăk ODA amuñ ƀiă, laih dong kiăng pơhưč tuh pơ alin amăng boh thâo ia rơgơi, logistics, pơkra gơnam mơ̆ng hmua klă hăng rông hlô tui boh thâo phrâo. Dak Lăk ăt kiăng hơmâo hơdră djru lăp djơ̆ či mă yua ngăn drăp rơbêh, pioh či đĭ kyar:“Ră anai tơring čar prăp laih hơdră či ngă bruă, samơ̆ pok pơhai ngă rơđah rơđông lĕ tơnap, biă ñu kual gah Ngŏ, ngăn hnă dŏ lu biă mă, brơi arăng apah yua lĕ ƀu hơmâo pô apah mă ôh, sĭ lĕ ƀu brơi, pơplih jing anih či ngă bruă kơnuk kơna, ngă sang ia jrao lĕ ƀu gêh găl ôh, anun jing kiăng gơnong dlông sem lăng hơmâo hơdră djru brơi amuñ ƀiă, hơmâo mơ̆ng ngŏ črâo brơi kah tơring čar mơ̆ng thâo ngă bruă, mă yua hơdôm kông ngăn anai hiư̆m pă mơ̆ng dưi đĭ kyar klă hloh”.

Pơhiăp ƀơi mông ngă bruă, ơi Nguyễn Thanh Nghị bơni biă kơ tơlơi gir mơ̆ng Dak Lăk amăng mông dŏ lu tơlơi tơnap, samơ̆ tơring čar kiăng ngă bruă khut khăt hloh amăng git gai, črâo bruă, biă ñu lĕ brơi prăk tuh pơ alin ring bruă kơnuk kơna, pơklaih brơi hơdôm ring bruă aka ƀu dưi ngă, ngă kaih, hrŏ trun sang anŏ rin. Ñu ăt lăi mơn, tơdơi kơ pơmut tơring čar, Dak Lăk hơmâo anih anom prong, ayuh hyiăng anih dŏ phara mơn, samơ̆ jơlan, sang dŏ, anih mă bruă, mơnuih mă bruă hăng bruă pơplih boh thâo mrô aka ƀu hơdeč ôh, bơbeč mơn kơ bruă đĭ kyar bơwih ƀong: “Kiăng lăng glăi hơdră ngă bruă hăng khŏm hơmâo akŏ bruă tong ten kơ rim bruă mă kơ hơdôm kơčăo bruă pơtrut đĭ kyar. Ră anai prăp rơmet, dưm dăp hiư̆m pă, biă ñu tuh pơ alin kiăng hơmâo mơnuih mă bruă hiư̆m pă, jơlan nao rai mơak mơn hă ƀô̆. Ƀing ta tơnap, jing kiăng anom bruă tuh pơ alin tŭ ư brơi prăk kăk kơ ƀing ta lĕ, ta khŏm hơmâo anŏ hơget hloh kơ arăng kah mơ̆ng dưi. Dua dong lĕ kiăng ngă hruaih brơi djŏp tơlơi hơmâo, ƀơi anăp lĕ aka ƀu pơhưč tuh pơ alin jing ƀing ta pơsir hĭ hơdôm kơčăo bruă dŏ kaih, glăk pioh dun ƀơ̆i hlâo”.

Mơ̆ng tơlơi pơčrâo trun ƀơi mông ngă bruă, ta ƀuh rơđah laih, bruă kiăng ngă mơ̆ng Dak Lăk ƀu pơdơi yah tơlơi pơtrun, hơdră djru đôč ôh, hloh kơ anun lĕ pơphun ngă tŭ yua, ba hơdôm tơlơi pơtrun mơ̆ng Ping gah sit nik mut amăng tơlơi hơdip mơda. Kiăng hnun, tơring čar kiăng ngă bruă rơđah hăng hơdôm jơlan hơdră, akŏ bruă sit nik; khŏm pơklaih brơi anŏ tơnap, ngă gêh găl kiăng dưi mă yua djŏp anŏ hơmâo, ngă gêh găl kiăng pơhưč tuh pơ alin hăng pơtrut đĭ kyar. Lơ̆m rim bruă mă dưi pok pơhai hrŏm, hơmâo pô gơgrong bruă, hơmâo boh than sit nik, tơlơi pơtrun mơ̆ng Ping gah ƀu djơ̆ jing jơlan či ngă bruă đôč dong tah, sit jing tơlơi pơtrut đĭ kyar, djru ba Dak Lăk hơmâo tơlơi kơtưn pơ anăp, đĭ kyar tañ hăng hơđong hloh pơ anăp anai./.