Čơtlăm lơ 9/1, Ping gah tơtring čar Dak Lak pơphun Jơnum klah čun ƀơƀiă 5 thun ngă tui Tơlơi pơtrun pơsit mrô 35/2018 mơ̆ng Ding jum kơđi čar tal 12 kơ "Kơtưn pơgang phun akha tơlơi pơmin mơ̆ng Ping gah, hrưn đĭ hơngah hơdôm tơlơi pơmin ƀu djơ̆, pơareh nao rai amăng rơnuk phrâo", Klah čun bruă Pơtô bruă Ping gah thun 2023, pok pơhai bruă mă thun 2024. Amăng hơdôm thun rơgao, bruă pơgang, pơgăn tơlơi pơmin ngă sat, ngă pơplih tơlơi rơnuk rơnua hăng bruă kơdŏng phă mơ̆ng ƀing kơdŏng glăi kơnuk kơna ƀơi Dak Lak hmâo laih sa dua bôh tơhnal lăp čih djă pioh.

Rim Ping gah hmâo gir run pơplih phrâo, pơđĭ tui anô̆ klă hăng bôh tơhnal bruă mă amăng tơlơi pơmin bôh thâo đưm. Khă hnun hai, ƀơi Dak Lak ăt dô̆ mơn hơdôm bôh than ngă glêh tơnap gah bruă rơnuk rơnua, hơđong, biă ñu hơdôm tơlơi bơdjơ̆ nao truh lŏn drŏn, djuai ania, tơlơi đăo. Ƀing kơdŏng glăi kơnuk kơna, yua mă bruă kơđi čar pơtrut dong, pơsur dong, pơdŏng khul kơdŏng phă Ping gah, kơnuk kơna, rơnuk git gai. Pơhiăp amăng mông jơnum, ơi Phạm Minh Tấn, Kơ-iăng Khua git gai Ping gah tơring čar Dak Lak rơkâo, pơ̆ anăp anai, hơdôm gưl Ping gah, gong gai pơtrut kơtang dong bruă hơngah tơlơi pơmin ƀu djơ̆, pơareh nao rai, pơgang phun akha tơlơi pơmin mơ̆ng Ping gah, lăng anai lĕ bruă mă yôm phăn na nao mơ̆ng abih bang glông bruă kơđi čar hăng mơ̆ng rim mơnuih apăn bruă, mơnuih ping gah. Hrŏm hăng anun, thâo, kơsem min, pel ĕp lăng hơget arăng lăi kiăng pơphô brơi, pơsir tañ hơdôm tơlơi hang tơngia phrâo hmâo mơ̆ng plơi pla, anom bruă./.