Tui anom bruă krăo lăng hơjan kơthel dêh čar, amăng hơdôm hrơi rơgao, amăng tơring čar Dak Lak hơmâo hơjan gap ƀrô, sa, dua bit anih hơjan prong, ngă djrưh lŏn, amra ƀuh ia kor ƀơi hơdôm ară ia krông čroh hnoh hăng lŏn tơhroh ƀơi kual kơčong čư̆ pơ 1 boh tơring glông amăng tơring čar. Amăng hră pơ-ar phrâo pơtrun, gơnong bruă ngă hmua hăng pơđĭ kyar ƀôn lan amăng tơring čar Dak Lak rơkâo Jơnum min mơnuih ƀôn sang djop tơring glông, plơi prong kiăo tui lăng tơlơi pơhing đăo lăng hlâo hơjan hlim, ia ling dăo, ia kor, lŏn tơhroh, lăi pơthâo brơi hmao tlôn kơ djop gưl gong gai, mơnuih ƀôn sang thâo kiăng răng kơđiăng amăng pơhlôm hlâo kiăng plai ƀiă răm rai.

Djop ƀôn lan amăng kual pơhŭi hlâo anun lĕ tơring glông Lak, Krông Ana, Krông Bông, Ea Súp, kiăng pơkiăo nao mơnuih pel ĕp ƀơi hơdôm boh plơi pla ter hang ia krông čroh hnoh, kual gah dơnung, kual amuñ ƀuh ia ling dăo, ia kor, lŏn tơhroh kiăng kơ pok phư glông ia; ba đuăi mơnuih ƀôn sang tơbiă mơng kual hŭi rơhyưt.