Ngă klă amăng bruă hyu tơña lăng kiăng thâo tơlơi pơmin, anŏ kiăng mơ̆ng ƀing đah kơmơi pơ kual plơi pla pioh lăi pơthâo, pơčrâo bruă pok pơhai ngă tui. Anai lĕ boh yom phun pơčrong sai ƀơi mông Jơnum kah pơpha tơlơi thâo thăi tom găn rơgao, rơkâo đĭ hăng hơdră pơsir brơi bruă mă hơdôm tơlơi ƀing ding kơna khul đah kơmơi mut phung amăng kual plơi pla či kiăng thun 2025, pơphun či tlam lơ 21/3 ƀơi tơring čar Dak Lak. 5 thun laih rơgao, djop gưl đah kơmơi mut phung ƀơi Dak Lak hơmâo pơsir truh kih 2000 mơta tơlơi pơdjơ̆ nao kơ ƀing đah kơmơi, čơđai muai, djă pioh, pơlar tui rơbêh 300 hơbô̆ bruă, khul ngă hrŏm ba glăi boh tŭ yua sit nik.

Mơ̆ng anun, pơtrut pơsur ƀing adơi amai thâo tơlơi pơhing hmar hloh hăng lăi glăi hơdôm mơta tơlơi pơhing mơnuih mơnam pơdah đĭ, pơtong glăi tong ten, djru hrŏm amăng bruă man pơdong plơi pla phrâo, ƀôn ƀut amăng plơi prong rơguăt. Ƀơi mông jơnum, ƀing pơ ala nao jơnum ăt pơčrâo rơđah hơdôm plang tơlơi pơhing kiăng ƀuh tañ hơdôm tơlơi hơmâo, pơdjơ̆ sao nao rai, ngă rung răng. Mơ̆ng anun ĕp hơdră pơsir hăng pơhlôm hlâo tơlơi ƀu klă, pơgăn tơlơi pơhing pôr tă tăn soh glăi, tơlơi pơčeh mă ča čot, ngă bơbeč djơ̆ truh pơ ƀing đah kơmơi hrơi.