110 čô čơđai ba gru hlâo, săng anai tŭ mă gru kơnăl pơ anăn ană amôn săng mơ̆ng Wa Hồ gưl tơring čar Dak Lak, sa gru grua hiam, mă bruă klă, hrăm hră thâo, săng, dưi găn rơgao tơlơi tơnap tap, laih anun ƀing čơđai hur har beč bal, ngă khua grup rơgơi, pơčrâo bruă mă kơ rơbêh 300 rơbâo čô čơđai sang hră mut phung, čơđai sang hră amăng đơ đam tơring čar. Ƀing ană amôn, čơđai sang hră anai hur har hrăm hră, ƀư̆ pran jua, ngă bruă ba glăi boh tŭ yua sit nik amăng bruă mă, pơgôp pran jua man pơdong lu ring bruă pioh kơ ƀing čơđai muai anet, amăng anih čơđai ngui ngor hăng djru ba ƀing gơyut gơyâo tơnap tap hăng hơdôm bruă anet dưi ngă.

Nao jơnum pơ anăn ană amôn săng mơ̆ng Wa Hồ tơring čar Dak Lak tal 11 anai, ƀing ană amôn dưi jơnum hrŏm lu bruă mă kah hăng nao ĕp pơnăng čih pioh bruă kơsung nao pơ Dơnung hăng nao lăi pơthâo bruă dưi ngă kơ Wa; nao čuă ƀing yă juăt iâu ƀing amĭ Việt Nam khin hơtai; adoh suang ngui ngor hrŏm tui anăn : Čơđai muai Dak Lak thâo gum pơgôp, gưt hiăp, săng ƀơi anih anom djru pơđĭ kyar bruă pơtô pơhrăm brơi ƀing čơđai ƀu klă drơi jăn; găn rơgao amăng tơlơi ngui ngor čơđai muai mơak, rơnuk rơnua, hrăm tui lu tơlơi mơak amăng bruă ngă hiam klă.