Ơi Lê Trọng Yên, Kơ-iăng khua Jơnum min mơnuih ƀôn sang tơring čar Dak Nông brơi thâo, tơring čar hơmâo bô-xit lu biă mă hăng lu anom bơwih ƀong sĭ mơdrô nô̆p hră pơ-ar tuh pơ alin klơi mă, pơkra bô-xit hăng mrô prăk tuh pơ alin lu. Kiăng pơtrut kơtang, tơring čar Dak Nông rơkâo grup hyu mă bruă lăi pơthâo hăng djop gưl bơdjơ̆ nao pơtrut pơsur tuh pơ alin man pơkra jơlan rơdêh treng tơkuh nao rai hăng kual Dap kơdư. Amăng anun, Dak Nông rơkâo đing nao bruă man pơkra jơlan rơdêh treng Dak Nông-Chơn Thành (Bình Phước) kiăng tơkuh nao rai hăng jơlan rơdêh treng Xuyên Á trun nao tơdrun kompăm Thị Vải, ngă gêh gal kơ bruă pơdŭ pơgiăng Alumin, ñôm.

Laih dong, tơring čar rơkâo kơsem min pơhrua dong bruă man pơkra jơlan rơdêh treng Dak Nông-Lâm Đồng-Bình Thuận amăng akŏ bruă dưm dăp man pơkra jơlan rơdêh treng dêh čar. Jơlan rơdêh treng anai ăt djru pơdŭ pơgiăng gơnam đang hmua hăng hơdôm gơnam tam pơkŏn dong, pơgôp pơtrut pơđĭ kyar bơwih ƀong huă-mơnuih mơnam amăng ƀon lan hăng hơdôm boh tơring čar amăng kual.