Pơhiăp git gai jơnum, Kơ-iăng khua dêh čar ơi Bùi Thanh Sơn lăng yom tơlơi gir run čih pơkra dăp hơdră bruă či ngă pơđĭ tui rơnoh pơhrui glăi tơring čar Gia Lai hăng Kon Tum, samơ̆ ăt pơtrun hiăp brơi ngă tui lu hơdră khom dưi ngă, pơtum nao bruă ngă blung a hăng sui thun pơ anăp adih. Hơdôm tơring čar plơi pla kiăng prăp lui bruă ngă hrŏm hăng djop ding jum, anom bruă pơsir hĭ tơlơi tơnap tap amăng kơčăo bruă dŏ kơđông, biă mă ñu amăng bruă pơkra apui yua.

Kơ-iăng khua dêh čar pơčrâo rơđah pran jua pơtrut bruă mă mơ̆ng gru grua hơmâo laih kah hăng anih ngă hmua, lŏn mơnai glai klô, gru grua hiam, bruă tuai čuă ngui kiăng pok pơhai djơ̆. Amăng bruă ngă hmua, dua boh tơring čar kiăng pơtrut ba yua boh thâo ia rơgơi phrâo, pơkra ming rai gơnam sĭ mơdrô hiam klă, biă mă ñu hơbơi sâm Ngọc Linh tơring čar Kon Tum, anăp nao pơjing bruă mă pơkra ming ia jrao akha kyâo yom kah hăng dêh čar Hàn Quốc. Kơ-iăng khua dêh čar pơtrun hiăp tơring čar Gia Lai hăng Kon Tum khom khut khăt ngă tui, anŏ kiăng prong, pơsir bruă mă,  hơdai gum hrŏm djop ding jum anom bruă kiăng găn rơgao tơlơi lông lăng, pơđĭ tui boh tŭ yua, pơhlôm tơlơi rơnuk rơnua hăng pơđĭ kyar hơđong kơjăp.