Dak Lak ră anai, hơmâo 2 kơčăo bruă FDI yua dêh čar Japan tuh pơ alin ngă tui. Hrŏm hăng anun, anom bruă ngă hrŏm jar kmar Japan JICA hơmâo djru kơ tơring čar Dak Lak ngă tui 21 hơdră bruă, kơčăo bruă ODA abih tih rơnoh prăk 24 klăk USD, pơtum nao amăng bruă pơkra apui lơtrik, hrĕ apui lơtrik, bruă pơđoh ia hơdjă yua hăng bruă man pơkra bơnư̆ pơkong ia. Mơ̆ng thun 2001 truh ră anai, tơring čar hơmâo tŭ mă 22 rơnoh prăk djru mơ̆ng gah rơngiao kơnuk kơna yua 3 boh sang bruă dêh čar Japan djru, rơnoh prăk 1,6 klăk USD. Lu sang bruă sĭ mơdrô ƀơi Dak Lak ră anai pơkra ming gơnam sĭ mơdrô ba nao pơ dêh čar Japan lu mơta kah hăng kơphê asar krô, kơphê pơkra jing tơpung, sing hơdom mriă, ka kao, makka.

Amăng 5 thun rơgao, Khul ngă giăng mah Việt Nam-Japan tơring čar Dak Lak hơmâo pơtruh nao rai, jak iâu lu anom bruă gah rơngiao kơnuk kơna dêh čar tač rơngiao djru giăm 4 klai 600 klăk prăk. Ƀơi mông jơnum ruah khua, Khul ngă giăng mah Việt Nam-Japan tơring čar Dak Lak rơwang bruă thun 2023-2028 hơmâo pơtong rơđah, rơwang bruă pơ anăp, Khul pơtum nao kơtưn pơtruh tơlơi pơhing pơtom hiăp, pơđĭ tui boh tŭ yua hơdôm bruă mă pơgang hơđong rơnuk rơnua, gum pơgôp, giăng mah hăng ngă hrŏm Việt Nam-Japan ƀơi tơring čar; pơtrut pơđĭ tui boh tŭ yua bruă mă djru mơ̆ng anom bruă gah rơngiao kơnuk kơna dêh čar tač rơngiao djru ba amăng tơring čar.