Hơdôm hrơi hăng anai, 5 čô ding kơna Grup mă bruă mrô 1-Grup wai lăng anih anom sĭ mơdrô gah mrô 4, gah sang bruă wai lăng anom sĭ mơdrô tơring čar Dak Lak pơđĭ tui mrô mơnuih, mông mă bruă, ƀơi mă bruă gah rơngiao mông mă bruă sit nik.Amai Nguyễn Thị Minh Hạnh, mơnuih sem lăng bruă mă mơ̆ng Grup anai brơi thâo, ƀing ding kơna ma bruă hlăk nao sem lăng pel ĕp bruă mă, pơkra ming, sĭ mơdrô mơ̆ng rơbêh 1.800 boh sang sĭ mơdrô amang plơi prong Ƀuôn Ma Thuôt.

“Grup hyu mă bruă hơmâo nao tơl sang sĭ mơdrô, jing anom bruă, sang anŏ mơnuih ƀôn sang pioh pơtô pơblang, pơtă pơtăn ngă djơ̆ tơlơi pơtrun mơ̆ng tơlơi phiăn amăng bruă mă pơkra ming hăng sĭ mơdrô. Amăng anun, rơkâo djop sang anŏ sĭ mơdrô sit blơi pơmut gơnam pioh sĭ glăi, khom blơi gơnam tŭ yua sit nik, thâo krăn anih pơkra ming, pơtep thâo rơnoh sĭ, ƀu lui sĭ mơdrô pơđĭ trun nua tă tăn ôh; ƀudah blơi pơđôm lui pioh đĭ nua kah sĭ; khom prăp lui gơnam sĭ mơdrô blơi pơmut, djop laih anun sĭ mơdrô tơpă amăng anih anom sĭ mơdrô hrŏm ab ih bang”.

Yă Võ Thị Bạch Nga, pô sang sĭ mơdrô gơnam ƀơi phường Tân Lập, tơring čar Dak Lak kah pơpha, sit truh bơyan akŏ thun phrâo ƀong têt rim thun, anom bruă kơnuk kơna hyu pơtô lăi, jak iâu, pơtrun hiăp djop sang anŏ sĭ mơdrô brơi kĭ hră ngă tui bruă sĭ mơdrô tơpă, pơhaih rơđah rơđong, djơ̆ hăng tơlơi phiăn kơnuk kơna pơtrun.

“Akŏ blan 1/2026, anom bruă wai lăng anom sĭ mơdrô djru, lăi pơthâo, pơtrun hiăp djop sang anŏ ngă hră ƀuăn rơ̆ng: Mơta sa lĕ blơi gơnam khom thâo rơđah phun tơdŭ mơ̆ng pơpă, khom rơđah rơđong hơmâo anăn blơi pơmut, pơhlom anŏ tŭ yua klă gơnam sĭ mơdrô, ƀu rơgao hrơi blan pơkă dưi mă yua; tơdah pơđĭ nua ăt khom ngă djơ̆ hăng tơlơi pơtrun mơ̆ng kơnuk kơna lăi pơthâo ten nua sĭ. Khom gơnam sĭ mơdrô prăp lui djop, bơwih brơi kơ tuai blơi….”.

Ngă tui tal rơwư̆ rơwang hyu sem lăng, pơgăn sĭ mơdrô gơnam ngă mă ča hla tui anăn gơnam arăng, gơnam sĭ mơdrô pơkra ƀu klă hiam, amăng hrơi blan hlâo amăng hrơi têt hăng tơdơi kơ hrơi têt ngă yang thun 2026 mơ̆ng djuai ania, tui hăng tơlơi git gai mơ̆ng Khul khua mua pơčrâo bruă 389 tơring čar Dak Lak, mơ̆ng plah wah blan 12 thun 2025 truh ră anai, Anom bruă wai lăng anom sĭ mơdrô amăng tơring čar, pơtum nao hơdôm mơta gơnam sĭ mơdrô arăng hơmâo pơkra ming bơwih brơi ngă yang thun phrâo ƀong têt. Giong ĕp lăng, ƀing tơhan anom bruă kơnuk kơna hơmâo ƀuh hăng pơsir 242 boh sang bruă ngă soh glăi, đŭ hăng prăk 2,3 klai prăk; laih dơ̆ng mă pơhrui abih gơnam pơkra ming ča čot anun ba čuh pơrai hĭ hăng rơnoh prăk truh 700 klăk prăk.

Ơi Vương Minh Sơn-Khua anom bruă tơhan wai lăng anom sĭ mơdrô tơring čar Dak Lak brơi thâo, mah hơdôm boh plơi gah ngŏ tơring čar bơbeč djơ̆ sat kơthel ngă, ia ling dăo răm ƀăm truh, samơ̆ kual gah yŭ lĕ djơ̆ bơyan ngă hmua, pĕ pơhrui boh čroh lu, anun yơh mơnuih ƀôn sang blơi prăp gơnam ngă yang thun phrâo đĭ tui mơ̆ng 25-30%. Anom bruă ăt git gai brơi djop khul grup tơhan wai lăng anom sĭ mơdrô kơtưn hyu ĕp lăng, kiăng pơgang hơđong nua, gơnam sĭ mơdrô, anih anom pơkra ming hăng sĭ mơdrô juăt hơmâo rim thun hăng sĭ mơdrô amăng plang internet facebook hai.

“Ƀing gơmơi nmgă hrŏm tơhan pơlih gah tơlơi bơwih ƀong huă mơ̆ng kông an tơring čar, anom bruă mă jia pok pơhai hrŏm hyu sem, pel ĕp amăng tal hrơi mông kơniă anai; kơtưn brơi tơhan mă bruă hrơi mlam pơblih nao rai, wơ̆t hrơi năm, hrơi tơjuh ăt khom ngă bruă đôč pioh hyu sem lăng hŭi ƀuh bruă sĭ mơdrô dơ̆p, pleč ƀlor, hmư̆ tơlơi pơhing lăi pơthâo, đuăi nao ĕp mơtam. Tơhnal pơtrun, khom pơgăn khut khăt gơnam pơkra ming ngă mă ča, ƀu hiam klă, ƀu tŭ yua, gơnam ƀu thâo ten phun tơdŭ, anih pơkra ming mơ̆ arăng ba sĭ mơdrô amăng anom sĭ mơdrô, bruă ngă anun kiăng pơgang brơi mơnuih ƀôn sang pô blơi yua, khom tŭ mă gơnam hiam klă amăng bơyan têt”.

Ăt jing ƀing tơhan ngă bruă phun mơ̆n tal hyu pơhlom, pogăn gơnam sĭ mơdrô ƀu tŭ yua hiam, gơnam hla tui mă anăn gơnam arăng tă tăn, hơmâo pơphun amăng rơbêh sa blan rơgao, Anom bruă tơhan pơlih gah tơlơi bơwih ƀong huă mơ̆ng kông an tơring čar Dak Lak, hơmâo ƀuh hăng pơsir 274 wơ̆t tơlơi ngă soh, ngă kơđi 279 čô mơnuih pô ngă soh sĭ mơdrô gơnam  arăng kom, gơnam blơi  ƀu hơmâo duh jia, gơnam ƀu tŭ yua klă, kah hăng sĭ mơdrô pơjeh pơdai ƀu thâo phun tơdŭ, anih ngă hmua pla pơjing, sĭ mơdrô ia jrao pơdjai rơ̆k ngă mă ča, hot hruh blơi dơ̆p mơ̆ng tač rơngiao, ƀơt mlăi pơtuh…..Kơ bruă pơtrut pơsur brơi răng kơđiăng hăng bruă pơkra ming gơnam ngă mă ča, pơgăn tơlơi ngă soh sĭ mơdrô hlâo kơ truh têt, amăng hrơi têt hăng tơdơi kơ hrơi têt Bính Ngọ, Trung tá Trịnh Ngọc Hà, Kơ-iăng khua anom bruă tơhan pơlih gah bơwih ƀong huă, Kông an tơring čar Dak Lak lăi pơthâo, anom bruă gơñu hơmâo pơtong rơđah, bruă mă phun pioh pok pơhai ngă tui.

“Ƀing tơhan pơlih gah tơlơi bơwih ƀong huă mơ̆ng kông an tơring čar Dak Lak ăt pơphun ngă klă bruă kiăng thâo krăn tañ, ƀuh hmar mơ̆ng ataih, mơ̆ng sang bruă dŏ pơkra ming amăng tơring čar hăng sĭ mơdrô tui plang internet. Hyu ĕp ƀoiw djop anih ter jơlan prong dêh čar, jơlan tơring čar, biă mă ñu jơlan mrô 1A găn nao ƀơi tơring čar Dak Lak, ăt kah hăng anih juăt pơtum gơnam blơi pơmut mơ̆ng tač rơngiao, gơnam sĭ mơdrô pơkra ming ƀu tŭ yua, hla tui anăn gru gơnam arăng hiăm klă. Mơ̆ng anun, ngă hrŏm tong ten tơhan djop sang bruă hyu suh ĕp, kiăo mă hăng pơsir khut khăt ƀing ngă soh, pơsir djơ̆ tơlơi phiăn kơnuk kơna pơtrun”.

Bruă prăp lui hlâo, ngă tui khut khăt mơ̆ng ƀing tơhan djop anom bruă kơnuk kơna ƀơi Dak Lak, amăng bruă pơhlom, pơgang hăng tơlơi soh pơdŭ pơgiăng, pơkra ming, sĭ mơdrô gơnam ngă măča hla tui gru gơnam arăng, gơnam pơkra mă tă tăn ƀu tŭ yua, amăng tal hyu suh mă hrơi blan kơniă hlâo kơ truh hrơi tết Bính Ngọ 2026 hlăk hơmâo djop anom bruă kơnuk kơna ƀơi Dak Lak pok pơhai ngă tui khut khăt ba glăi boh tŭ yua sit nik. Anih anom sĭ mơdrô gơnam têt thun anai, amra dưi pel ĕp tong ten, gơnam tam sĭ mơdrô khom hiam klă, tŭ yua, djru pơgang brơi mơnuih ƀôn sang blơi yua hơđong pran jua, mơak ngă yang thun phrâo čơkă tết rơnuk rơnua hơđong, djop djel trơi pơđao.