Hlăk dŏ blơi gơnam ƀong pioh lui sui jing gơnam krô sĭ ƀơi siêu thị Coop Mart plơi prong Ƀuôn Ma Thuôt, amai Võ Thị Mỹ Hương, dŏ ƀơi phường Tân Lợi, plơi prong Ƀuôn Ma Thuôt brơi thâo, thun anai yua tơlơi bơwih ƀong huă tơnap tap anun sang anŏ gơñu kơnong blơi gơnam hơgĕt kiăng yua biă mă đôč.

“Sang anŏ kơnong blơi hơdôm mơta gơnam kiăng yua rim hrơi đôč, pioh čơkă thun phrâo ƀong têt, yua klin kheng Covid 19 ăt dŏ bơbeč djơ̆ anun yơh mơnuih ƀôn sang ƀu hyu blơi lu gơnam tam ôh, kơnong blơi mă hơdôm mơnong ƀong huă kiăng rim hrơi đôč”.

Nao ĕp lăng pơ sang čơ prong Ƀuôn Ma Thuôt ƀuh mơ̆n, gơnam sĭ mơdrô kơ têt, ƀing sĭ mơdrô pơ anai dưm pơdă lu mơta gơnam tam, gru anăn, hruh pơhrôp hiam biă mă, samơ̆ mơnuih ƀôn sang găn rơgao nao rai blơi yua ƀu lu ôh, sui ha wơ̆t ƀuh dau klâo čô ƀu dik dăk ôh. Amai Lê Thị Thùy Như, dŏ sĭ mơdrô ƀơi anih C, amăng sang čơ prong Ƀuôn Ma Thuôt, sĭ mơdrô sui 15 thun laih pơ anun, sĭ mơdrô gơnam tam yua amăng sang anŏ ñu brơi thâo hnong mơnuih nao blơi thun anai ƀiă đơi, ñu lăi.

“Sĭ ƀu tloh ôh pơkă hăng thun hlâo, bơhmutu thun hlâo si mơdrô pơhrui glăi mơ̆ng 5-7 klăk prăk, thun anai kơnong 2-3 klăk prăk đôč. Thun hlâo gơnam tam djơh hăng anai mơ̆ng lơ 20 pơdlông lĕ sĭ arăng blơi hñăp laih, samơ̆ thun anai kret kruai mơtam”.

Lu sang sĭ mơdrô ƀañ kĕo, ƀañ mưt, asar mơkai ăt ƀiă mơnuih blơi. Tui hăng ơi Lương Ngọc Hoàng pô sĭ mơdrô ƀañ kĕo ƀơi sang čơ prong Ƀuôn Ma Thuôt lăi, thun anai, arăng hyu blơi ƀu lu ôh, kơnong amăng rơnuč rơwang hrơi kom đôč lu ƀiă mơnuih găn rơgao nao rai blơi gơnam, anun ñu blơi pơmut kơnong 60% đôč pơkă hăng thun hlâo, samơ̆ rơnoh blơi kah hăng ră anai sit mơ̆n ƀu kơnang ôh dưi sĭ abih gơnam tam blơi pioh anai:

“Hnong arăng hyu blơi  ăt ƀu lu ôh, rơnoh sĭ mơdrô ƀu đĭ lơi. Kah hăng tơđar thun, thun hlâo mông anai lu laih mơnuih rai blơi, pơkă hăng thun hlâo mông anai dik dăk mơtam bruă sĭ mơdrô”.

Him lăng hnong blơi yua amra hrŏ kơtang amăng anih anom sĭ mơdrô gơnam têt thun anai ƀơi Dak Lak, lu sang sĭ mơdrô anet hyu ĕp mă anih ba hyu sĭ mơdrô, tơña lăng anŏ či kiăng blơi mơ̆ng mơnuih ƀôn sang, đah mơ̆ng ĕp hơdră klă hloh blơi pơđôm lui gơnam tam sĭ mơdrô hăng pơpha hyu sĭ. Hơmâo mơ̆n hơdôm sang anŏ sĭ mơdrô amet pok pơhư prong bruă sĭ mơdrô pôr pơthâo amăng plang website, yua telephôn rơgơi sĭ mơdrô, pok anăn lăi pơthâo amăng facebook, zalo kiăng ƀing tuai ƀuh tơdah blơi lĕ jao prăk hăng mrô laih anun ba gơnam tơl sang pô blơi. Lu hơdră pơsur tơlơi sĭ mơdrô, pơtrut blơi gơnam ăt pok pơhai ngă tui kah hăng pơtrun rơnoh sĭ, pơblih hơdră dăp gơnam, lăi pơthâo amăng anih anom sĭ mơdrô kiăng pơhưč ƀing blơi ĕp lăng, pơtrut blơi yua. Amai Nguyễn Hằng Nga, khua anih sĭ mơdrô sum ao lăi:

“Thun anai ƀuh bruă sĭ mơdrô, blơi yua ƀu lu ôh, ƀing tuai blơi aset hloh. Ƀing juăt blơi gơnam thâo krăn pô ăt rô nao rai mơ̆n bơhmutu, hlâo adih blơi 10, ră anai trun hĭ blơi kơnong 5-6 đôč, tuai pơkŏn lĕ aset tui. Ƀing sĭ mơdrô anet ăt gir run djă bong hơdră mă bruă sĭ mơdrô, hơmâo mơ̆n ƀiă gơnam sĭ đĭ nua samơ̆ ta ăt ƀu khin pơđĭ nua lơi yua kơ lu mơnuih blơi jing ƀing thâo krăn juăt nao rai, ta pơđĭ nua lĕ ƀu anăm bong glăi tuai blơi ôh, ƀơi anŏ ñu ƀu khin pơđĭ nua kiăo tui arăng, tŭ ư hăng sĭ mơdrô kơmlai ƀiă baih lah, kiăng găn rơgao hĭ thun blan tơnap tap”.

Ƀu kơnong anih anom sĭ mơdrô gơnam yua đôč rơkut tuai blơi, anih sĭ mơdrô bơnga têt ăt ƀu hơmâo pô blơi lơi mơ̆n. Ơi Quang Thế Phong, sa čô pô đang bơnga dar prong mơ̆n ƀơi să Hòa Phú, plơi prong Ƀuôn Ma Thuôt lăi, thun anai, adai hyuh hyiăng pơđao ƀiă gêh găl kơ ƀing ngă hmua, đang pla bơnga dar pĕ hĭ hla tha laih anun pơkra glăi kiăng bơnga čuh blang djơ̆ hrơi ngă yang thun phrâo. Bơyan sĭ bơnga thun anai, ơi Phong pla 3000 phun bơnga dar kơñĭ, hăng lu thun, hnơr phara soh. Ră anai, ñu hlăk pla phun bơnga dưm amăng blŏ laih anun pơgiăng nao sĭ. Bơyan bơnga dar thun anai rơnoh ba sĭ lu hloh kơ thun hlâo năng ai 500 phun, samơ̆ kơmlai ƀu lu ôh.

“Rơnoh sĭ thun anai ƀu hrup tơđar thun ôh yua kơ bơnga dar djop anih gơñu ba sĭ pơ anai lu. Bơhmutu phun bơnga prong sui thun arăng sĭ truh 4 klăk prăk samơ̆ têt thun anai sĭ kơnong 3 klăk mơkrah ƀudah 3 klăk đôč. Lu pô đang bơnga gơmơi pơđĭ trun mă rơnoh sĭ kiăng dưi pơhno hăng bơnga dar mơ̆ng anih pơkŏn ba sĭ hrŏm. Ră anai, đang gơmơi tŭ mă hră rơkâo blơi, gơnam sĭ kơ ƀing blơi sĭ glăi, laih anun ba ƀiă pơdă pơ tơdron lak plơi prong Ƀuôn Ma Thuôt sĭ amăng lơ 22/12 blan rơnuč thun djuai ania ta jĕ têt anai”.

Mơnuih ƀôn sang pơkă hnong blơi yua hăng pơblih tơlơi pơmin, tơlơi juăt blơi yua gơnam têt mơ̆ng rim sang anŏ ngă kơ anih anom sĭ mơdrô gơnam têt ƀơi Dak Lak kret kruai hĭ. Ƀing sĭ mơdrô anet hăng sang sĭ mơdrô dŏ pơkă hnong đôč, mah tui anun djop mơnuih dŏ kơnang kơ anih anom sĭ mơdrô amra dik dăk hloh amăng hrơi giăm têt, hrơi mông mơnuih mă bruă mơ̆ng ataih glăi ngui čơkă thun phrâo amăng kual plơi pla tŭ mă prăk apah bơni lu ƀiă či blơi gơnam ngui ngor čơkă thun phrâo.