Anai lĕ khul ngă hrŏm amăng mơnuih mơnam-bruă ngă blung a amăng bruă wai lăng Logistics, pơdŭ pơgiăng hăng bơwih bơwăng gah tơdrun kompan ia rơsĭ ƀơi tơring čar tơdơi kơ pơmut glăi tơring čar plah wah Phú Yên hăng Dak Lak.

Khul anai mă bruă tui tơlơi phiăn pơkă, ding kơna amăng khul rong mut ngă hrŏm, wai lăng mă gơnam kông ngăn pô, ĕp prăk kăk, kiăng iâu pơtum, djru nao rai ding kơna amăng khul, pơgang ba anŏ tŭ yua hăng tơlơi dưi djơ̆ găl mơ̆ng sang bruă mơdrô ngă ding kơna khul, laih dơ̆ng pơtrut bruă pơđĭ tui logistics hăng sĭ mơdrô bơwih bơwăng ƀơi tơdrun kompan ia rơsĭ ƀơi tơring čar. Bruă akŏ pơjing khul anai pơphun lơ̆m thun blan Dak Lak hlăk pok pơhư prong tui anih anom pơđĭ kyar mơ̆ng kual Dap Kơdư čư̆ siăng, trun nao pơ ia rơsĭ, ngă gêh găl kơ bruă ba gơnam sĭ mơdrô, pơdŭ pơgiăng, blơi pơmut hăng bơwih bơwăng brơi logistics. Ră anai, hơmâo 50 boh sang bruă, sang anŏ mơnuih ƀôn sang ngă ding kơna khul, gum hrŏm amăng bruă logistics pơdong hơjai dưm gơnam sĭ mơdrô, gơnam pơdŭ pơgiăng, sĭ mơdrô hăng pơkra ming gơnam sĭ mơdrô čih anăn ngă hrŏm kiăng pơgang ba.