Mơng mơguah sing bring, hơmâo lu mơnuih ƀôn sang să Hòa Thịnh hăng hơdôm boh să ieo gah hơmâo ƀuh ƀô̆ mơta ƀơi Gong kut pioh hơdor kiăng pơpŭ bơni ling tơhan hlâo kơ glăi pơ anih anom. Mông bưp ol kơdol ƀlĕ ia mơta, mă tơngan, kuar pơpŭ bơni, pơđut hĭ giăm dua blan ling tơhan gum hrŏm djru brơi tơdơi kơ hơjan ia ling dăo kơtang hloh. Ƀuh tơlơi anun mơng mơguah sing bring, nai Nguyễn Thị Hồng Nhị, nai pơtô ƀơi sang hră čơđai anet Hòa Thịnh-anih pơdong tơhan jang jai mơng hơdôm anom bruă ling tơhan, ăt lĕ anih pơlir pran khăp pap kơplah wah nai pơtô, čơđai sang hră hăng ƀing ling tơhan, ñu ol kơdol lăi:

“Amăng hơdôm hrơi ling tơhan dŏ glăi ƀơi sang hră, pran khăp pap hơmâo pơlir kjăp, jê̆ giăm hăng ƀing čơđai sang hră, kâo pô ăt kiăng khăp biă mă hăng ƀing ƀô̆ đô̆i, ră anai ƀing gơñu giong bruă laih ăt ol kơdol mơn. Hrơi anai lĕ hrơi rơnuč dưi bưp ling tơhan, ră anai amăng plơi pla kret kruai yơh, hơdôm hrơi nao sang čơ ƀu ƀuh ling tơhan, bơ hơdôm ară jơlan amăng plơi pla ăt ƀu ƀuh ling tơhan lơi, tơdơi anai amra hơdor na nao. Amăng pran jua pơpŭ bơni biă mă ƀing ƀô̆ đô̆i hăng ling tơhan”.

Anai lĕ sa amăng hơdôm anom bruă nao tơl plơi pla djru brơi mơng hơdôm hrơi blung a tơdơi kơ hơjan ia dăo. Trung úy Phan Ngọc Dân, Trung đoàn 584, anom bruă git gai ling tơhan tơring čar Dak Lak brơi thâo, anom bruă ngă rah bruă mă mơnuih, djru rŭ pơdong glăi anŏ răm rai rah hăng djru rŭ pơdong glăi sang răm rai djru brơi mơnuih ƀôn sang kual ia ling dăo:

“Hrơi anai amăng hrơi mông prap čih ataih yơh, neh met wa tơgŭ mơng 5 mông mơguah kiăng tơnă hơbai gơnam ƀong mơguah, tơdơi kơ huă asơi giong, neh met wa ăt ƀlĕ ia mơta mơn, ƀu nao bưp ling tơhan hlâo ƀing gơñu glăi kâo ăt ol kơdol mơn. Lơm glăi pơ anih anom, ƀing ling tơhan djru bruă ƀơi anai ăt amra hơdor na nao hrơi blan hơdip pơlir hăng neh met wa ƀơi anai găn rơgao tal hơjan ia ling dăo kơtang hloh kiăng rŭ pơdong glăi tơlơi hơdip kơ neh met wa”.

Mơng lơ 1/12/2025 truh lơ 10/1/2026, rơbêh 204 rơbâo wŏt ƀing apăn bruă, ling tơhan Quân khu 5, anom bruă git gai ling tơhan tơring čar Dak Lak hăng tơhan wai pơgang mă hăng giăm 6.000 boh rơdêh hơmâo ba nao, akŏ pơjing 331 grup, pok pơhai man pơdong 331 boh sang djru brơi hơdôm boh sang anŏ hơmâo sang glưh răm rai hăng pơkra ming 90 boh sang răm kơtang ƀơi 13 boh să, phường. Hrŏm hăng anun, djop khul ling tơhan hơmâo gum hrŏm ba đuăi giăm 11.300 boh sang anŏ hăng rơbêh 36.000 čô mơnuih nao pơ anih rơnuk rơnua; rơmet pơagaih 207 boh sang hră, 42 anom bruă ia jrao, 281 sang gru grua, 38 anih anom Jơnum min mơnuih ƀôn sang; pơkra ming rơbêh 50 km jơlan nao rai hăng djru brơi rơbêh 3.500 boh sang anŏ rơmet pơagaih, hơđong tơlơi hơdip mơda. Kơnong amăng bruă jơlan glông, dơnao pơkŏng ia djru brơi bơyan ngă hmua pơdai puih phang, hơdôm anom bruă hơmâo pok pơhai 50 grup, 98 anih, pơgiong rơbêh 63.220 met ring bruă.

Kơ-iăng Khua Jơnum min mơnuih ƀôn sang tơring čar Dak Lak Đào Mỹ pơsit tong hơdôm tơlơi gum pơgôp prong prin mơng ling tơhan amăng bruă pơhlôm hlâo hăng rŭ pơdong glăi yua hơjan ia ling dăo.

“Rup rap ling tơhan gum hrŏm mơnuih ƀôn sang, ƀing ta glăk hơdip amăng hrơi blan mah tơnap tap samơ̆ ăt bă blai pran khăp pap kơplah wah ling tơhan mơnuih ƀôn sang. Anai lĕ hơdôm rup rap, hơdôm bruă mă hiam klă. Kâo pơ ala brơi khua mua tơring čar pơpŭ bơni biă mă hăng ƀing apăn bruă, ling tơhan amăng djop khul tơhan lăi hrŏm hăng Ling tơhan hnun mơn amăng dua blan rơgao hăng sit biă ñu lĕ “Hơdră bruă ngă bruă tui Quang Trung” hăng ră anai ƀing gơmơi rai pơ anai kiăng hơmâo tơlơi pơpŭ bơni hlâo či glăi”.

Pơđut hĭ mông bưp, Đại tá Cao Văn Mười, kơ-iăng khua anom pơphô bruă Quân khu 5 pơsit tong “Hơdră ngă bruă tui Quang Trung” ƀu djơ̆ kơnong klup glăi bơbung sang brơi sir kjăp đôč ôh mơ̆ ăt pioh glăi pran khăp pap dơlăm kơplah wah ling tơhan mơnuih ƀôn sang, kơ pran kơtang mơng pran khăp pap hăng pran gum pơgôp:

“Rĭm ring bruă, rĭm boh sang hơmâo pơgiong ƀu djơ̆ kơnong lĕ gơnam djru đôč ôh mơ̆ ăt pơƀuh mơng pran đăo gơnang, mơng pran pơlir ling tơhan mơnuih ƀôn sang, anai lĕ tơlơi ngă pơdao mơng pran khăp pap kar hăng tơlơi pơsit tong pơpă mơnuih ƀôn sang bưp tơnap tap ƀơi anun hơmâo ling tơhan. Hơdră ngă bruă tui Quang Trung pơđut hĭ hơmâo tŏ tui gru grua ling tơhan tơbiă rai mơng mơnuih ƀôn sang, yua mơnuih ƀôn sang ngă bruă mơng ling tơhan rơnuk wa Hô, čih pioh tơlơi hing ang amăng rơnuk rơngai; pơdah pran kơtang mơng pran gum pơgôp, tơlơi mut hrŏm mơng djop anih anom kơđi čar hăng mơnuih ƀôn sang. Hơdră ngă bruă tui Quang Trung pơđut hĭ kơđŏm glăi pran khăp pap, hơdôm boh sang sir kjăp hăng sit biă ñu lĕ pran khăp pap kơplah wah ling tơhan mơnuih ƀôn sang jai kjăp phik./.