Jơnum hơmâo tơlơi mut hrŏm mơng djop gơnong bruă, sang bruă, gong gai ƀon lan, ƀing kơhnâo kơhnăk, anom bơwih ƀong sĭ mơdrô hăng hơdôm anom bơwih ƀong amăng bruă tuai čuă ngui. Tui akŏ bruă anai, Dak Lak črâo ba bruă pơđĭ kyar tuai čuă ngui tui jơlan mơtah, hơđong kjăp, pơlir hăng djă pioh hơdôm gru grua yôm phara, lŏn mơnai glai čư̆ hăng pơjing gơnam tuai čuă ngui yôm mơng kual Dap kơdư. Hơdôm gơnam phun hơmâo pơsit lĕ tuai čuă ngui amăng đang hmua, anih pơdơi pran, ĕp lăng gru grua plơi pla, čuă ngui pơ đang hmua, čuă ngui kơphê, čuă ngui rơman jê̆ giăm hăng čuă ngui pơlir hăng hơdôm anih gru grua čing hơgor mơng kual Dap kơdư.

Amăng mông jơnum, ƀing khua mua brơi thâo Dak Lak hơmâo lu tơlơi gal amăng pơđĭ kyar tuai čuă ngui amăng đang glai, drai ia, dơnao ia hrŏm hăng gru grua yôm phara mơng kual Dap kơdư. Samơ̆, tuai čuă ngui ƀơi Dak Lak ăt dŏ lu tơlơi gun anun lĕ anih anom, jơlan glông aka ƀu pơkra ha amăng plĕ, kơƀah gơnam klă hloh, tơlơi bơwih bơwang amăng mơmŏt mlăm dŏ aset hăng aka ƀu hơmâo lu anom bơwih ƀong sĭ mơdrô ba jơlan hlâo kiăng ngă lar hyu. Tơring čar kiăng pơplih pơkra anih anom, jơlan glông, pel ĕp glăi hơdôm tơlơi glăk hơmâo kiăng pơđĭ kyar prong ƀiă, đing nao hơdôm gơnam kơđŏm glăi anŏ phara.