Khua git gai Ping gah, Khua mir sir ơi Tô Lâm hok mơ-ak lơm hơdôm grup bơwih ƀong pơprong mơng Thái Lan pok prong tuh pơ alin, bơwih ƀong sĭ mơdrô ƀơi Việt Nam, sit biă ñu lĕ amăng hơdôm bruă lăp djơ̆ tơlơi rơkâo pơđĭ kyar mơng Việt Nam hăng amra ba glăi dong tơlơi yôm amăng tơlơi rô nao rai ngă hrŏm dua bơnah. Khua git gai Ping gah, Khua mir sir lăi pơtong, Việt Nam lăng yôm tơlơi rô nao rai ngă hrŏm yôm phăn djop mơta hăng Thái Lan, amăng anun hơmâo ngă hrŏm bơwih ƀong huă, sĭ mơdrô, tuh pơ alin hăng pơlir bruă bơwih ƀong sĭ mơdrô lĕ tơlơi akŏ phun, pơgôp pơtrut pơđĭ kyar hơđong kjăp hăng kơtưn pơlir hơbit kơplah wah dua boh dêh čar. Tŭ yap bruă tuh pơ alin, bơwih ƀong sĭ mơdrô mơng Grup bơwih ƀong TCC ƀơi Việt Nam amăng hơdôm thun rơgao, Khua git gai Ping gah, Khua mir sir pơsur grup tŏ tui tuh pơ alin, pơđĭ kyar bruă bơwih ƀong sĭ mơdrô ƀơi Việt Nam tui jơlan gah hrưn đĭ klă amăng bruă wai lăng, pơtrut mă yua boh thâo phrâo, pơplih pơčeh phrâo, wai pơgang jum dar hăng pơgôp prong brơi mơnuih mơnam amăng plơi pla.

Ăt amăng hơdôm hrơi nao čuă Thái Lan, hlâo anun, Khua git gai Ping gah, Khua mir sir ơi Tô Lâm hơmâo nao tŭi ñang ƀơi anih pioh hơdor kơ Khua mir sir Hồ Chí Minh hăng bưp mơnuih ƀôn sang Thái, djuai phun mơng Việt Nam glăk dŏ hơdip ƀơi kal Ngŏ kơdư Thái Lan.