Lơ 27/5, Ding jum ia jrao ngă hrŏm Jơnum min mơnuih ƀôn sang tơring čar Quảng Ninh, jơnum pơphun Blan ngă bruă yua kơ čơđai muai thun 2026 hăng akŏ ñu “Ƀing čơđai muai hyuk hyak mơak klă, rơnuk rơnua, kơjăp tơkai yak nao amăng rơnuk rơbâo thun yua mrô”. Pơhiăp ƀơi mông jơnum pơphun bruă mă, kơ-iăng khua mir sir, yă Võ Thị Ánh Xuân lăi pơtong ƀing čơđai lĕ mơnuih kơñ pơgi kơ lŏn ia, tuh pơ alin kơ čơđai jing tuh pơ alin kơ bruă pơđĭ kyar hơđong kơjăp kơ lŏn ia.

Hơdôm thun laih rơgao, lu jơlan hơdră djru kơ čơđai muai hơmâo pok pơhai tŭ yua sit nik kah hăng lui apah prăk, pơhrŏ prăk apah hrăm hră kơ čơđai sang hră djop gưl phun; djru prăk huă tơhrơi kơ čơđai sang hră dŏ glăi amăng sang hră; man pơdong sang hră đôm lăm lir dua gưl….Blan ngă bruă yua kơ čơđai thun anai, amra pok pơhai lu bruă mă sit nik amăng đơ đam dêh čar kah hăng pơđĭ tui tơlơi thâo ba yua mrô hăng rơnuk rơnua sem lăng plăng internet online kơ ƀing čơđai, pơhlôm hăng pơgang tơlơi ƀlung ia, tơlơi truh ruă nuă, tơlơi sat taih čom hăng arăng ngă sat kơ čơđai muai; pơtum lu bruă ngă djru pơgang ba ƀing čơđai muai.